बातमी ऐका (Marathi Voice Reader)
बीड : जिल्ह्यातील नित्रुड येथील शामद सयदालम यांनी संकटाला न घाबरता मेहनतीच्या जोरावर पोल्ट्री व्यवसायात यश मिळवले आहे. काही वर्षांपूर्वी ते मुकादमकीचे काम करत होते. मात्र या व्यवसायातून ना अपेक्षित उत्पन्न मिळत होते ना आर्थिक स्थैर्य, उलट अनेकदा तोटाच सहन करावा लागत असल्याने कुटुंबाचा खर्च भागवणे अवघड झाले होते. त्यांच्या नावावर अवघी दोन एकर शेती होती. मात्र शेतीतूनही खर्च वजा जाता हातात फारसे काही उरत नव्हते. त्यामुळे उत्पन्नाचा दुसरा मार्ग शोधण्याची गरज त्यांना जाणवली आणि त्यांनी पोल्ट्री व्यवसायात नशीब आजमावण्याचा निर्णय घेतला.
नवीन व्यवसाय सुरू करताना त्यांनी मोठी गुंतवणूक न करता केवळ एक हजार पक्ष्यांपासून सुरुवात केली. सुरुवातीला पक्ष्यांची काळजी घेणे, खाद्याचे नियोजन, औषधोपचार आणि बाजारपेठेचा अभ्यास करत त्यांनी प्रत्येक टप्प्यावर अनुभव घेतला. अनेक अडचणी आल्या तरी त्यांनी हार मानली नाही. व्यवसायातील चढ-उतार समजून घेत त्यांनी हळूहळू पोल्ट्रीचा विस्तार केला. मेहनत, सातत्य आणि योग्य नियोजन यामुळे त्यांचा व्यवसाय दिवसेंदिवस वाढत गेला.
आज त्यांच्या पोल्ट्री फार्ममध्ये जवळपास आठ हजार पक्षी आहेत. आधुनिक पद्धतीने व्यवस्थापन करत त्यांनी व्यवसायात चांगली प्रगती साधली आहे. पक्ष्यांच्या आरोग्याची काळजी, स्वच्छता आणि वेळेवर खाद्य पुरवठा यामुळे उत्पादनातही सातत्य राहिले. बाजारपेठेची गरज लक्षात घेऊन त्यांनी व्यवसायाचे नियोजन केल्याने त्यांना चांगला आर्थिक फायदा होऊ लागला. त्यांच्या यशामुळे परिसरातील अनेक शेतकरी आणि तरुण पोल्ट्री व्यवसायाकडे आशेने पाहू लागले आहेत.
या व्यवसायातून शामद सयदालम यांना दरवर्षी सुमारे 12 लाख रुपयांपर्यंत निव्वळ नफा मिळत आहे. एकेकाळी आर्थिक अडचणीत असलेले त्यांचे कुटुंब आज स्वबळावर उभे राहिले आहे. शेतीला जोडधंदा म्हणून सुरू केलेला पोल्ट्री व्यवसाय आता त्यांच्या उत्पन्नाचा मुख्य आधार ठरला आहे. शेतीसोबत पूरक व्यवसाय केल्यास कमी क्षेत्रातूनही चांगले उत्पन्न मिळू शकते, हे त्यांनी प्रत्यक्ष कृतीतून दाखवून दिले आहे.
शामद सयदालम यांची ही यशोगाथा ग्रामीण भागातील तरुणासाठी प्रेरणादायी ठरत आहे. पारंपरिक शेतीवर पूर्णपणे अवलंबून न राहता आधुनिक आणि नियोजनबद्ध शेतीपूरक व्यवसाय स्वीकारल्यास आर्थिक प्रगती साधता येते, असा संदेश त्यांच्या प्रवासातून मिळतो. योग्य जिद्द, मेहनत आणि व्यवसायाकडे सकारात्मक दृष्टी असेल तर छोट्या सुरुवातीलाही मोठे यश मिळू शकते, हे त्यांनी सिद्ध केले असून आज त्यांच्या यशामुळे परिसरातील अनेक युवक पोल्ट्री व्यवसाय सुरू करण्यासाठी पुढे येत आहेत.
