कंत्राटी शिक्षण सेवकांचे गटविकास अधिकाऱ्यांना निवेदन
सुरेश पाचभाई मारेगाव
रखडलेले कंत्राटी शिक्षण सेवकांचे मानधन त्वरित अदा करण्यात यावे यासाठी कंत्राटी शिक्षण सेवकांनी दि. 16 जुलैला गटविकास अधिकाऱ्यांना निवेदन दिले.
सध्या सगळीकडेच शिक्षकांची संख्या कमी होत आहे.विद्यार्थ्यांची शैक्षणिक गुणवत्ता वाढीस लागावी,त्यांचे शैक्षणिक नुकसान होऊ नये यासाठी शासनाने सगळीकडे कंत्राटी पद्धतीने मानधन तत्वावर शिक्षकांची भरती केली.मारेगाव तालुक्यामध्ये 58 कंत्राटी शिक्षण सेवकांची नेमणूक केल्या गेली.या कंत्राटी शिक्षकांनी विद्यार्थ्यांची शैक्षणिक गुणवत्ता वाढविणे आणि जी.प.शाळेमध्ये नवचैतन्य निर्माण करण्याचा प्रयत्न केला.अल्प मानधन तत्वावर काम करूनही या कंत्राटी शिक्षण सेवकांना नियमित वेतन दिले गेले नाही.
सुरवातीला 5 हजार तर नंतर 7 हजार 500 याप्रमाणे या शिक्षण सेवकांना मानधन दिल्या गेले.परंतु मार्च 2024 व एप्रिल 2024 या दोन महिन्यांचे वेतन अजूनही यांना मिळालेले नाही. याविषयी या शिक्षण सेवकांनी अनेकदा कार्यालयामध्ये जाऊन विचारणा केली असता तुमचे पैसे चार दिवसात जमा होईल असे उत्तर अनेकदा ऐकायला मिळाले.त्यामुळे आमचे थकीत असलेले मानधन त्वरित मिळावे असे निवेदन कंत्राटी शिक्षण सेवकांनी गटविकास अधिकारी यांना दिले.यावेळी अंकुश आत्राम,राजू ढोरे,स्वप्नील देऊळकर,मानसी नित,वैष्णवी ढवस,पूनम ढवस, निलेश मंगाम उपस्थित होते.
