प्रा. दिलीप अलोने यांचे मार्डी येथील विद्यार्थ्यांना मार्गदर्शन
सुरेश पाचभाई / मारेगाव
आनंद हेच जीवनाचे अंतिम ध्येय असावे. जीवन कसे असावे यापेक्षा विद्यार्थ्यांनी आनंददायी जीवन जगण्यावर भर द्यावा. निरपेक्ष, निर्विकार आणि दुसऱ्याला दुःखी न करता मिळणारा आनंद हाच खरा आनंद आहे, असे प्रतिपादन प्रा. दिलीप अलोने यांनी केले.
ते मार्डी येथील आदर्श हायस्कूल तथा कला उच्च माध्यमिक विद्यालयात आयोजित “यही है जिंदगी” या विषयावरील मार्गदर्शनपर कार्यक्रमात बोलत होते. यावेळी शिक्षण प्रसारक समितीचे अध्यक्ष जयसिंग पाटील गोहोकर हे अध्यक्षस्थानी होते.
प्रमुख पाहुणे म्हणून मार्डीच्या उपसरपंच शोभा कालर, किन्हाळा येथील सरपंच शुभम भोयर, ग्रामपंचायत सदस्य सुरेश चांगले, गणेश कनाके, देवाळा येथील उपसरपंच सुरेश लांडे, दिवाकर पंडिले, प्राचार्य सुमित आवारी, मुख्याध्यापक अनंत शिवरकर उपस्थित होते.
प्रा. अलोने पुढे म्हणाले, विद्यार्थी जीवनात इतिहास बदलू शकतात.
किती वाचले यापेक्षा वाचलेले कितपत समजले आणि लक्षात राहिले याला महत्त्व द्यावे. विद्यार्थ्यांमध्ये विविध कलागुण असतात. त्यांची ओळख करून जीवनाचे ध्येय निश्चित करावे. शिक्षण घेत असताना केवळ गुणांचा विचार न करता ज्ञान संपादनावर भर द्यावा.
तणाव न घेता आत्मविश्वासाने वाटचाल केल्यास यश निश्चित मिळते.
कार्यक्रमात उपसरपंच शोभा कालर यांनी विद्यार्थ्यांना प्रेरणादायी मनोगत व्यक्त केले. अध्यक्ष जयसिंग पाटील गोहोकर यांनीही विद्यार्थ्यांना मार्गदर्शन केले.
कार्यक्रमाचे प्रास्ताविक मुख्याध्यापक अनंत शिवरकर यांनी केले. संचालन हर्षदा गानफाडे यांनी तर आभार कोमल डाखूरे यांनी मानले. कार्यक्रमाला शिक्षक, शिक्षकेतर कर्मचारी, पालक व विद्यार्थी मोठ्या संख्येने उपस्थित होते.
