सिंधी येथील महिलांचे पोलीस उपनिरीक्षकांना निवेदन
प्रमोद रा. मेश्राम मारेगाव
गावात सुरू असलेली अवैध दारू विक्री बंद करण्यात यावी आणि या अवैध दारूपासून सिंधी येथील नागरिकांची सुटका करण्यात यावी अशा प्रकारचे निवेदन घेऊन सिंधी येथील महिला पोलीस ठाण्यात धडकल्या. त्यांनी पोलीस उपनिरीक्षक विकी जाधव यांना अवैध दारू विक्री बंदी बाबतचे निवेदन सादर केले.
तालुक्यात अनेक ठिकाणी अवैध दारू विक्रीला मोठ्या प्रमाणात ऊत आलेला आहे. तालुक्यातील अनेक गावात ही दारू विक्री मोठ्या प्रमाणात सुरू आहे.पोलीस विभागाचे या अवैध दारू विक्रीकडे दुर्लक्ष दिसत असल्याने ही दारू विक्री तालुक्यात पुन्हा फोफावत असल्याची चर्चा नागरिकांच्या माध्यमातून ऐकायला मिळत आहे.
सिंधी येथील अंकुश महादेव वैद्य हा सिंधी पहापळ रस्त्यादरम्यान अवैधपणे दारूची खुलेआम विक्री करीत होता.दिनांक 8 फेब्रुवारीला महिलांनी त्याला दारू विकताना रंगेहात पकडले.त्याला दारू विक्रीसाठी मज्जाव केला असता उलट त्याने महिलांशी हुज्जत घालत त्यांच्याशी वाद घातला.सिंधी या गावामध्ये भक्तीमय वातावरण मोठ्या प्रमाणात असते.
वर्षातून अनेक धार्मिक कार्यक्रम येथे होत असतात. या गावातील भजनी मंडळ सुद्धा प्रसिद्ध असून अशा या भक्तीमय वातावरणाला अवैध दारू विक्री मलीन करीत असते. महिलांनी या अंकुश वैद्य ला दारू विकण्यास मज्जाव केला असता त्याने गावकरी माझे काहीच करू शकत नाही, पोलीस वाल्यांना मी भीत नाही, तुमच्याकडून जे होते करा अशा प्रकारची दमदाटी महिलांना केली. अखेर महिलांनी दिनांक 9 फेब्रुवारीला पोलीस ठाणे गाठत आपली तक्रार पोलीस उपनिरीक्षक विकी जाधव यांना दिली.
यावेळी सरपंच नीलिमा चंद्रशेखर थेरे, संतोष भाऊराव निब्रड, पोलीस पाटील, पुरुषोत्तम नानाजी भोयर, दिनेश झित्रूजी गेडाम, सोनू श्यामसुंदर ढवस, प्रियंका संदीप देवाळकर, सविता विलास नेहारे,छाया संतोष निब्रड, कुसुम डाखरे, सुरेखा म्हसे, संगीता महारतळे, कोमल डाहुले, विजया गोहोकर, प्रियंका देवाळकर, शशिकला लेडांगे, इंदुबाई लेडांगे, सोनाबाई भगत, रेखा महारतळे, लता जांभुळकर,अंजनाताई पोतराजे, सुरेखा गायकवाड, पल्लवी परचाके, मंजुषा जांभुळकर, सुनीता परचाके यांच्यासहित अनेक महिला पोलीस स्टेशनमध्ये उपस्थित होत्या.