मातृभूमीच्या सुपुत्राच्या आगमनाने गावात उत्साहाचे वातावरण; ग्रामस्थ व उन्नती महिला शेतकरी समूहाकडून जंगी सत्कार
सुरेश पाचभाई मारेगाव
मारेगाव तालुक्यातील आकापुर येथील सुपुत्र निकेश बंडूजी पुनवटकर यांनी भारतीय सुरक्षा दलातील भारत-तिबेट सीमा पोलीस दलात (ITBP) निवड झाल्यानंतर सहा महिन्यांचे कठोर प्रशिक्षण यशस्वीरित्या पूर्ण केले. प्रशिक्षणानंतर आज, सोमवार दि. २४ ऑगस्ट २०२६ रोजी दुपारी १ वाजता, ते आपल्या जन्मगावी आकापुर येथे दाखल होताच गावकऱ्यांनी त्यांचे अत्यंत उत्साहात व जल्लोषात भव्य स्वागत केले.
उत्तराखंड येथे भारतीय सुरक्षा दलात निवड झालेल्या निकेश पुनवटकर यांच्या यशामुळे आकापुर गावाच्या शिरपेचात मानाचा तुरा खोवला गेला आहे. देशसेवेचे स्वप्न उराशी बाळगून त्यांनी घेतलेल्या अथक परिश्रमाला यश मिळाल्याने संपूर्ण गावात आनंदाचे आणि अभिमानाचे वातावरण निर्माण झाले आहे.
या वेळी समस्त गावकरी आकापुर तसेच उन्नती महिला शेतकरी समूह, आकापुर यांच्या वतीने निकेश पुनवटकर यांचा जंगी सत्कार करण्यात आला. गावातील नागरिक, युवक व महिलांनी मोठ्या संख्येने उपस्थित राहून या देशरक्षक सुपुत्राचे अभिनंदन केले. स्वागत सोहळ्यामुळे गावात देशभक्तीचा उत्साह संचारला होता.
“गावचा एक सुपुत्र देशाच्या सीमा सुरक्षेसाठी सज्ज झाला असून, निकेश पुनवटकर यांच्या यशाचा प्रत्येक आकापुरवासीयाला अभिमान आहे,” अशा भावना यावेळी ग्रामस्थांनी व्यक्त केल्या.
निकेश पुनवटकर यांच्या या उल्लेखनीय यशाने परिसरातील युवकांसमोर प्रेरणादायी आदर्श निर्माण झाला असून, त्यांच्या भावी देशसेवेसाठी सर्व स्तरांतून शुभेच्छांचा वर्षाव होत आहे.
