राज्य महामार्गावरील बोटोनी ते जळका दरम्यानची घटना
सुरेश पाचभाई मारेगाव
साळ्याला पोहोचवून आपल्या गावी परत निघालेल्या दुचाकीस्वाराला एका अज्ञात वाहणाने समोरून जोरदार धडक दिली. यात दुचाकीस्वाराचा जागीच मृत्यू झाला. सदर घटना मारेगाव तालुक्यातील राज्य महामार्गावरील बोटोनी ते जळका दरम्यान असलेल्या डाम टेकडीजवळ आज दिनांक 30 मे 2025 रोज शुक्रवारला सकाळी 8 वाजताच्या सुमारास घडली.
प्रदीप गुंवत राऊत वय अंदाजे 40 वर्षे रा.आवळगाव ता.मारेगाव असे अपघातात मृत्यू झालेल्या व्यक्तींचे नाव आहेत.प्रदीप हा आज सकाळी 6 वाजता आवळगाव येथून साळ्याला सोडण्यासाठी खंडणी येथे गेला होता.तेथील काम आटोपून तो बोटोनी- करंजी मार्गे स्वगावी आवळगाव येथे जाण्याकरिता निघाला. पण रस्त्यातच अज्ञात वाहनाने त्याच्या दुचाकीला जबर धडक दिली. यात त्याचा दुर्दैवी मृत्यू झाला.
रस्त्याने ये – जा करणाऱ्या काही नागरिकांनी सदर घटनेची माहिती लगेच मारेगाव पोलिसांना दिली.माहिती मिळताच पोलीस घटनास्थळी दाखल झाले. व त्याला प्राथमिक उपचारासाठी ग्रामीण रुग्णालय मारेगाव येथे दाखल करण्यात आले. पण तेथील डॉक्टरांनी प्रदीप याला तपासून मृत घोषित केले. प्रदीप यांच्या पश्चात आई,पत्नी,भाऊ, दोन मुले असा आप्त परिवार आहे.सदर अपघाताचा पुढील तपास मारेगाव पोलीस करीत आहे.
