रस्त्यात निष्काळजी पणाने उभ्या असलेल्या ट्रकला दुचाकीस्वाराने मागून दिली होती धडक
सुरेश पाचभाई मारेगाव
मारेगाव वरून काम आटोपून आपल्या घरी परत जात असतांना एका दुचाकीस्वाराने उभ्या ट्रकला मागून धडक दिल्याची घटना काल दिनांक 9 ऑगस्ट 2025 रोज शनिवारला सायंकाळी 7:30 वाजताच्या सुमारास घडली होती.सदर अपघातामध्ये गंभीर जखमी झालेल्या दुचाकीस्वाराचा अखेर मृत्यू झाला. मृत व्यक्तीचे नाव नारायण दौलत मुंगोले वय 55 वर्ष रा.हटवांजरी ता.मारेगाव असे होते.
नारायण हे काल सायंकाळच्या सुमारास शेतातील फवारणीचे औषध आणण्यासाठी हटवांजरी येथून मारेगाव येथे गेले होते. फवारणीचे औषध घेऊन गावाकडे परत येत असताना बुरांडा (ख) स्टॉप पासुन जवळ कृषी विद्यालय जवळ निष्काळजीपणाने रस्त्यात उभ्या असलेल्या ट्रकला त्यांच्या दुचाकीची मागून धडक बसली.
या अपघातात ते गंभीर जखमी झाले होते. रस्त्याने ये- जा करणाऱ्या काही नागरिकांनी त्यांना लगेच मारेगाव येथील ग्रामीण रुग्णालयात दाखल केले होते.पण तेथील डॉक्टरांनी प्रथम उपचार करून त्यांना पुढील उपचारासाठी चंद्रपूर येथे स्थलांतरित केले होते.पण रस्त्यातच त्यांचा मृत्यू झाल्याची माहिती प्राप्त झाली आहे.
कुटुंबातील कर्ता व्यक्ती गेल्याने कुटुंबावर दुःखाचे डोंगर कोसळले आहे. नारायण यांच्या पश्चात वडील,पत्नी,एक मुलगा,एक मुलगी असा आप्त परिवार आहे. त्यांच्या अशा अपघाती मृत्यूने हटवांजरी गावात व परिसरात हळहळ व्यक्त केली जात आहे.सदर अपघाताचा पुढील तपास मारेगाव पोलीस करत आहे.
