सुरेश पाचभाई मारेगाव
मारेगाव : तालुक्यातील हटवांजरी येथील जीवनविकास विद्यालयात शालेय स्तरावरील भव्य विज्ञान प्रदर्शनीचे आयोजन करण्यात आले. या प्रदर्शनीत तब्बल २० हून अधिक प्रयोग व प्रात्यक्षिके सादर करून विद्यार्थ्यांनी विज्ञानाची उपयुक्तता प्रभावीपणे मांडली.
विद्यार्थ्यांनी मानवी शरीररचना, कृषी तंत्रज्ञान, पर्यावरणपूरक उपाय, नवनवीन ऊर्जा स्रोत अशा विविध संकल्पना आकर्षक रीतीने सादर केल्या. यामुळे शालेय स्तरावरही विज्ञानविषयक नवोन्मेषी दृष्टी विकसित होत असल्याचे प्रकर्षाने जाणवले.
प्रदर्शनीचे उद्घाटन केंद्रप्रमुख श्री. मेश्राम सर यांच्या हस्ते झाले. प्रमुख पाहुणे म्हणून हटवांजरीच्या सरपंच सौ. प्रीती कुळमेथे यांनी विद्यार्थ्यांच्या कल्पकतेचे कौतुक केले. कार्यक्रमाच्या अध्यक्षस्थानी मुख्याध्यापक श्री. मुकेश महाडुळे होते. आपल्या अध्यक्षीय भाषणात त्यांनी “विज्ञान ही फक्त पुस्तकी बाब नसून दैनंदिन जीवनाचा अविभाज्य घटक आहे” असे प्रतिपादन करून विद्यार्थ्यांना प्रयोग व नवकल्पना समाजापर्यंत पोहोचविण्याचे आवाहन केले.
या प्रदर्शनीच्या यशस्वी आयोजनासाठी विज्ञान शिक्षक मानकर सर यांनी विशेष परिश्रम घेतले. सर्व शिक्षकवृंद, शिक्षकेतर कर्मचारी, विद्यार्थी व ग्रामस्थ यांचा उल्लेखनीय सहभाग लाभला.
अशा विज्ञान प्रदर्शनींमुळे विद्यार्थ्यांच्या सर्जनशीलतेला आणि वैज्ञानिक दृष्टिकोनाला मोठी चालना मिळते, हे यावेळी ठळकपणे दिसून आले.
