सुरेश पाचभाई मारेगाव
मारेगाव कान्हाळगाव युगांतर प्राथमिक/माध्यमिक आश्रमशाळा, कान्हाळगाव, ता. मारेगाव, जि. यवतमाळ येथील ज्येष्ठ शिक्षक ज्ञानेश्वर झित्रुजी ढोके हे आपल्या प्रदीर्घ व यशस्वी सेवेतून नुकतेच सेवानिवृत्त झाले. त्यांच्या सेवानिवृत्ती निमित्त शाळेच्या वतीने विशेष सत्कार व निरोप समारंभाचे आयोजन करण्यात आले.
ज्ञानेश्वर ढोके यांनी सन १९९४ पासून शिक्षण क्षेत्रात अविरत ज्ञानदानाचे पवित्र कार्य केले. आपल्या सेवाकाळात त्यांनी केवळ पुस्तकी ज्ञान न देता विद्यार्थ्यांमध्ये संस्कार रुजवून त्यांचे भविष्य घडविण्यात मोलाचे योगदान दिले. मनमिळाऊ स्वभाव, प्रभावी अध्यापन पद्धती व सहकार्याची भावना यामुळे ते विद्यार्थी, शिक्षक व पालकांमध्ये लोकप्रिय होते.
निरोप समारंभाच्या अध्यक्षस्थानी माध्यमिक मुख्याध्यापक संजयराव पाटील होते. प्रमुख अतिथी म्हणून प्राथमिक मुख्याध्यापक प्रशांतजी पस्वाके, माजी मुख्याध्यापक विजयराव काटवले, प्रकाशराव बाहे, सुरेशराव काकडे, सेवानिवृत्त शिक्षक दिनेश वैद्य तसेच सत्कारमूर्ती ज्ञानेश्वर ढोके व नंदाताई ढोके उपस्थित होते.
यावेळी शाळेच्या वतीने शाल, श्रीफळ व ड्रेस देऊन ज्ञानेश्वर ढोके यांचा भावपूर्ण सत्कार करण्यात आला. तसेच नंदाताई ढोके यांचा साडी-चोळी देऊन सन्मान करण्यात आला. याशिवाय विजयराव काटवले, प्रकाशराव बाहे, सुरेशराव काकडे, गजानन उपरे, विनोद नित, एकनाथ सारखे, दिनेश वैश्य व प्रदीप खामनकर यांनी वैयक्तिकरित्या शाल व श्रीफळ देऊन सत्कार केला.
यावेळी उपस्थितांनी ज्ञानेश्वर ढोके यांच्या प्रदीर्घ शैक्षणिक कार्याचा गौरव करून त्यांच्या पुढील सुखी, समाधानी व निरोगी आयुष्यासाठी शुभेच्छा दिल्या.कार्यक्रमाचे सूत्रसंचालन गजानन उपरे यांनी केले, तर आभार प्रदर्शन प्रदीप खामनकर यांनी केले.
