शेतकऱ्याचे ७० हजार रुपयांचे नुकसान
सुरेश पाचभाई मारेगाव
मारेगाव तालुक्यातील खापरी येथील शेतकरी किसन सिताराम कुचनकार यांच्या बैलाचा सर्पदंशामुळे मृत्यू झाल्याची घटना घडली. या घटनेमुळे संबंधित शेतकऱ्याचे अंदाजे ७० हजार रुपयांचे आर्थिक नुकसान झाल्याचे सांगण्यात येत आहे.
किसन कुचनकार यांचे खापरी परिसरातील शेत गट क्रमांक १७ मध्ये शेत आहे. शेतातील गोठ्यासमोर बैलाला सापाने दंश केल्याची प्राथमिक माहिती असून, त्यानंतर बैलाची प्रकृती गंभीर झाली आणि त्याचा मृत्यू झाला, अशी माहिती शेतकऱ्यांकडून देण्यात आली आहे.
शेतीकामासाठी उपयुक्त असलेल्या बैलाच्या अचानक मृत्यूमुळे कुचनकार कुटुंबावर आर्थिक संकट ओढवले आहे. या घटनेची संबंधित पशुसंवर्धन व महसूल विभागाने नोंद घेऊन पंचनामा करावा तसेच शासनाच्या नियमानुसार नुकसानभरपाई मिळावी, अशी मागणी शेतकरी किसन सिताराम कुचनकार यांनी केली आहे.
दरम्यान, सर्पदंशामुळेच बैलाचा मृत्यू झाल्याची अधिकृत पुष्टी पशुवैद्यकीय तपासणी व संबंधित विभागाच्या अहवालानंतर होणे अपेक्षित आहे.
