सुरेश पाचभाई, मारेगाव
मारेगाव तालुक्यातील पहापळ येथे दिनांक ४ डिसेंबर २०२५, गुरुवारी कृषी विभागाच्या नानाजी देशमुख कृषी संजीवनी प्रकल्प अंतर्गत रब्बी हंगाम मार्गदर्शन शिबिराचे आयोजन करण्यात आले. या शिबिरात गहू पिक शेतीशाळा, PFME योजना, फळबाग लागवड योजना, सुरक्षित फवारणी प्रत्यक्षिक अशा विविध कृषी योजनांची माहिती शेतकऱ्यांना देण्यात आली. तसेच आधुनिक तंत्रज्ञानावर आधारित महाविस्तार AI कृषी अॅप विषयी सविस्तर प्रात्यक्षिकासह मार्गदर्शन करून त्याचा प्रचार व प्रसार करण्यात आला.
कार्यक्रमाला तालुका कृषी अधिकारी कु. दीपाली खवले, मंडळ कृषी अधिकारी किशोर डोंगरकर, माविमच्या सुचिता राऊत, सहाय्यक कृषी अधिकारी महेश पाचपौर, गणेश कोल्हे, विवेक पारधी, विनायक जुमनाके, गौरी योगेश मडतापे आदी मान्यवर उपस्थित होते.
गावातील महिला व पुरुष शेतकऱ्यांचा उत्स्फूर्त प्रतिसाद मिळत मोठ्या संख्येने शेतकऱ्यांनी कार्यक्रमाला उपस्थिती लावली. अधिकाऱ्यांनी रब्बी हंगामातील पिक व्यवस्थापन, हवामान बदलाचे परिणाम, उत्पादन खर्चात बचत, कीड-रोग नियंत्रणातील वैज्ञानिक उपाययोजना, तसेच फळबाग लागवडीतील नवीन संधी याबाबत सर्वंकष मार्गदर्शन केले.
तालुका कृषी विभाग, मंडळ कृषी अधिकारी कार्यालय आणि माविम यांच्या संयुक्त विद्यमाने घेण्यात आलेल्या या शिबिरामुळे शेतकऱ्यांना आगामी हंगामासाठी उपयुक्त तंत्रज्ञान, कृषी योजना आणि नव्या संधींचा लाभ घेण्यासाठी निश्चितच प्रोत्साहन मिळणार असल्याचे मत उपस्थितांनी व्यक्त केले.