विदर्भ एस.पी. न्यूज नेटवर्क डेस्क: वणी
वणी:नूरजहाँ बेगम चॅरिटेबल ट्रस्टद्वारे चालवल्या जाणाऱ्या आशियाना हॉलमध्ये १२ डिसेंबर २०२५ रोजी आणखी एक सुंदर, साधे आणि सामाजिक संदेश देणारे लग्न पार पडले. आर्थिक अडचणींना सामोरे जाणाऱ्या दोन कुटुंबांच्या आयुष्यात या विवाहाने नवी आशा निर्माण केली.
वधू पतीच्या निधनानंतर उदरनिर्वाहासाठी संघर्ष करत होती. तिला ९ वर्षांची मुलगी असून तिच्या संगोपनाची जबाबदारी एकटीवर होती. दुसरीकडे वरालाही स्वतःच्या आयुष्यात अनेक अडचणींचा सामना करावा लागत होता. त्याला एक अपंग मुलगी असून मर्यादित आर्थिक परिस्थितीमुळे स्थिर संसार उभारणे त्याच्या आवाक्याबाहेर वाटत होते.
या विवाहामुळे एका मुलीला आईचे प्रेम मिळाले, तर दुसरीला वडिलांचा आधार. नव्या कुटुंबाच्या निर्मितीमुळे दोघांनाही त्यांच्या आर्थिक अडचणींवर मात करण्याची संधी मिळाली असून दोन मुलांच्या संगोपनासाठीही एकत्रित आधार मिळाला आहे.
या लग्नाची खास बाब म्हणजे कोणताही हुंडा देण्यात किंवा घेण्यात आला नाही. वधूने हुंडा नाकारला, तर वरानेही कोणतीही मागणी केली नाही. साधेपणा, सन्मान आणि परस्पर समजुतीच्या आधारावर हा विवाह पार पडला.
या प्रसंगी काही डॉक्टर तसेच नूरजहाँ बेगम चॅरिटेबल ट्रस्टचे सदस्य उपस्थित होते. त्यांनी नवदांपत्याला शुभेच्छा व आशीर्वाद दिले. कोणताही दिखावा न करता, सामाजिक बांधिलकी जपत पार पडलेल्या या छोटेखानी विवाहाने उपस्थितांची मने जिंकली.
