राज्याचे क्रीडामंत्री माणिकराव कोकाटे यांना कोर्टाने सदनिका घोटाळ्याप्रकरणी 2 वर्षांच्या कैदेची शिक्षा ठोठावली आहे. यामुळे त्यांच्यावर अटकेची टांगती तलवार उभी राहिली आहे. लोकप्रतिनिधित्व कायद्यानुसार 2 वर्षे किंवा त्याहून अधिकच्या शिक्षा झाल्यास लोकप्रतिनिधींच्या पदावर गदा येते. त्यामुळे आता कोकाटेंचे मंत्रिपदही जाण्याची शक्यता वाढली आहे. पण विधानसभा अध्यक्ष राहुल नार्वेकर किंवा मुख्यमंत्र्यांनी याविषयी अद्याप कोणतेही पाऊल उचलले नसल्यामुळे त्यांच्यावर टीकेची झोड उठवली आहे. राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनी या प्रकरणी विधानसभा अध्यक्ष राहुल नार्वेकर यांच्यावर खोचक शब्दांत टीका केली आहे. माणिकराव कोकाटे यांना शिक्षा झाल्यानंतरही कायद्याचा गाढा अभ्यास असणारे विधानसभा अध्यक्ष कोकाटेंची आमदारकी रद्द का करत नाहीत? कायद्यानुसार लोकसभेत राहुल गांधींची आणि महाराष्ट्रात सुनिल केदार यांचे सदस्यत्व रद्द करण्यात आले होते. मग कोकाटेंना वेगळा न्याय का? की कोकाटे कायद्यापेक्षा मोठे आहेत? गल्लीतील भांडणांची दखल घेऊन विधिमंडळात तात्काळ निर्णय घेतले जातात मात्र आज जेव्हा निर्णय घेणे गरजेचे आहे तेव्हा विलंब का केला जातोय ? माननीय विधानसभा अध्यक्षांनी न्यायालयाच्या निर्णयाचा मान राखत तात्काळ माणिकराव कोकाटेंची आमदारकी रद्द करून आदर्श प्रस्थापित करावा, असे त्यांनी म्हटले आहे. कोकाटेंची तत्काळ हकालपट्टी करा – दमानिया दुसरीकडे, सामाजिक कार्यकर्त्या अंजली दमानिया यांनीही माणिकराव कोकाटेंची मंत्रिमंडळातून हकालपट्टी करण्याची मागणी केली आहे. माणिकराव कोकाटे हे आमदारकीतून आणि मंत्रीपदावरून तत्काळ बाहेर. सेक्शन 8 (4) हा कायदा ज्यामुळे अपील मध्ये गेल्यावर दिलासा मिळायचा हा कायदा सुप्रीम कोर्टाने रद्द (Ultra Vires) घोषित केला आहे. त्यामुळे ते अपील जरूर करू शकतात, पण त्यांचे मंत्रिपद आणि आमदारकी संपली, असे त्यांनी म्हटले आहे. कोकाटेंच्या अटकेसाठी कोर्टात अर्ज माणिकराव कोकाटे यांच्या नावाने अटक वॉरंट काढण्यासाठी प्रथ वर्ग न्याय दंडाधिकाऱ्यांच्या कोर्टात अर्ज दाखल केला आहे. कोकाटेंविरोधात हस्तक्षेप याचिका दाखल करणाऱ्या अंजली दिघोळे राठोड यांनी हा अर्ज दाखल केला आहे. आज त्यावर सुनावणी होणार आहे. कोर्टाने अटक वॉरंट काढण्याची मुभा दिली, तर कोकाटेंना कोणत्याही क्षणी अटक होण्याची शक्यता वाढली आहे. कोकाटे या प्रकरणी हायकोर्टात दाद मागणार असल्याचीही माहिती आहे. अजित पवारांची फडणवीसांकडे धावाधाव दुसरीकडे, क्रीडामंत्री माणिकराव कोकाटेंविरोधात अटक वॉरंट निघण्याची शक्यता वाढल्यामुळे सत्ताधारी राष्ट्रवादी काँग्रेसचे अध्यक्ष तथा राज्याचे उपमुख्यमंत्री अजित पवार यांनी मुख्यमंत्री देवेंद्र फडणवीस यांची भेट घेऊन त्यांच्याशी कोकाटेंना अटक झाल्याच्या स्थितीत काय करायचे? यावर चर्चा केली आहे. त्यात फडणवीसांनी कोकाटेंवर कारवाई झाली तर पुढे काय करायचे याचा निर्णय अजित पवारांवरच सोपवल्याची माहिती आहे. राष्ट्रवादी काँग्रेस कोकाटेंच्या राजीनाम्याच्या बाजूने नाही, पण अटक वॉरंट होण्यास पक्षाची कोंडी होऊ शकते. त्यामुळे अजित पवार याविषयी काय निर्णय घेतात? हे पाहणे औत्सुक्याचे ठरणार आहे.
