वाशिम येथील भाजपच्या एका उमेदवाराकडून शिवसेना उद्धव बाळासाहेब ठाकरे पक्षाच्या उमेदवारावर चाकू हल्ल्याचा प्रयत्न झाल्याची गंभीर घटना समोर आली आहे. या घटनेमुळे शहरात तणाव निर्माण झाला असून, भाजप उमेदवाराविरोधात पोलिसांत गुन्हा दाखल करण्यात आला आहे.
वाशिम जिल्ह्यातील लाखाळा परिसरात शुक्रवारी मध्यरात्री 1.30 च्या सुमारास ही घटना घडली आहे. ठाकरे गटाचे उमेदवार गुड्डू उर्फ प्रवीण डोळे यांनी दिलेल्या तक्रारीनुसार, भाजप उमेदवार सतीश उर्फ गल्ला वानखेडे यांनी निवडणुकीच्या कारणावरून त्यांच्याशी वाद घातला. तसेच त्यांना जीवे मारण्याची धमकीही दिली. प्रवीण डोळे हे आपल्या मित्रांसोबत चर्चा करत होते. त्यावेळी सतीश वानखेडे तिथे आले. यावेळी निवडणूक व मतदानाच्या मुद्यावरून त्यांच्यात वाद झाला. हा वाद वाढल्यानंतर वानखडे यांनी डोळे यांच्यावर चाकूने हल्ला करण्याचा प्रयत्न केला. तसेच गोळ्या घालून ठार मारण्याची धमकीही दिली.
वानखेडे व त्यांच्या समर्थकांनी यावेळी डोळे यांच्यासोबत असलेल्या त्यांच्या मित्रांनाही मारहाण केली. या घटनेनंतर वाशिम शहर पोलिस ठाण्यात तक्रार दाखल करण्यात आली आहे. त्यानुसार, सतीश उर्फ गल्ला वानखेडे याच्याविरोधात मारहाण, धमकी व हल्ल्याचा प्रयत्न केल्याचा गुन्हा दाखल करण्यात आला आहे. सतीश वानखेडे सध्या फरार आपल्याविरोधात गुन्हा दाखल झाल्याची माहिती मिळताच सतीश वानखेडे हा फरार झाला आहे. वाशिम पोलिस त्याचा शोध घेत आहेत.
दरम्यान, या घटनेुमळे वाशिम शहर व परिसरात वातावरण तापले असून, निवडणूक काळात घडलेल्या या घटनेवर तीव्र चिंता व्यक्त केली जात आहे. पण ठाकरे गटाने मतदारांना कोणत्याही दबावाला व धमक्यांना बळी न पडता निर्भयपणे मतदान करण्याचे आवाहन केले आहे. नांदेडच्या धर्माबादमध्ये मतदारांना डांबून ठेवले दुसरीकडे, नांदेड जिल्ह्यातील धर्माबाद येथे मतदारांना डांबून ठेवल्याचा संतापजनक प्रकार उजेडात आला आहे.
धर्माबाद नगरपालिका निवडणुकीसाठी शनिवारी मतदान सुरू आहे. शहरातील बन्नाळी भागातील एका मंगल कार्यालय येथे भाजप उमेदवार व कार्यकर्त्याकडून मतदारांना पैसे वाटण्याचा प्रयत्न झाला. यासाठी शंभर ते दीडशे मतदार मंगल कार्यालयात आणण्यात आले. पण यावेळी पैसे वाटताना गोंधळ झाल्याने मतदारांनी आम्हाला कोंडून ठेवल्याचा आरोप केला.
पोलिसांनी या मंगल कार्यालयात कोंडून ठेवलेल्या मतदारांना बाहेर काढले. धर्माबाद येथे अध्यक्ष पदासाठी 9 व 11 प्रभागातून 22 सदस्यांसाठी 125 उमेदवार मैदानात आहेत.
