अज्ञात प्राणी आईच्या कुशीतील चिमुकलीला घेऊन पसार:शरीराचे लचके तोडत छातीसह खाल्ले दोन्ही हात; नागपुरातील भयंकर घटना

एका अज्ञात प्राण्याने आईच्या कुशीत झोपलेल्या एका 6 महिन्यांच्या चिमुकलीला उचलून नेऊन तिला ठार मारल्याची भयंकर घटना नागपूरच्या नरसाळा भागात घडली आहे. या घटनेत प्राण्याने चिमुकलीच्या छातीसह दोन्ही हात खाल्लेत. या घटनेमुळे परिसरात मोठी खळबळ माजली आहे. यासंबंधीच्या माहितीनुसार, हुडकेश्वर पोलिस ठाणे हद्दीतील नरसाळा परिसरात ही मन हेलावून टाकणारी घटना घडली आहे. येथील स्मशानभूमी लगतच्या नाल्याच्या मागे असलेल्या मजुरांच्या झोपडपट्टीत अज्ञात प्राण्याच्या हल्ल्यात अवघ्या 6-7 महिन्यांच्या एका चिमुकलीचा मृत्यू झाला आहे. अनुष्का रवी मेळा असे मृत मुलीचे नाव आहे. ती मध्य प्रदेशातील सेलमिया गावची रहिवासी होती. ठेकेदाराच्या कामासाठी तिचे कुटुंब नागपुरात आले होते. ते सध्या नरसाळा परिसरातील झोपडपट्टीत वास्तव्यास होते. मध्यरात्री 2 च्या सुमारास घडली घटना अनुष्का शुक्रवारी रात्री आपल्या आईच्या कुशीत झोपली होती. मध्यरात्री केव्हातरी एका अज्ञात प्राण्याने तिला तेथून अलगद उचलून नेले. काही वेळाने मध्यरात्री 2 च्या सुमारास तिच्या आईला जाग आली असता त्यांना अनुष्का दिसली नाही. त्यामुळे त्यांनी व कुटुंबीयांनी तिचा शोधाशोध सुरू केला. रडारड सुरू केली. हा आवाज ऐकूण शेजारी गोळा झाले. त्या सर्वांनी अनुष्काचा शोध घेतला असता झोपडपट्टीलगतच तिचा छिन्नविच्छिन्न अवस्थेतील मृतदेह आढळून आला. छात व दोन्ही हात खाल्ले स्थानिकांच्या माहितीनुसार, अज्ञात प्राणाने अनुष्काच्या शरीराचे अक्षरशः लचके तोडले आहेत. तिची छाती व दोन्ही हात खाल्लेत. या परिसरात रात्रीच्या वेळी रस्त्यावर दिवे नाहीत. त्यामुळे अंधाराचा फायदा घेत ही घटना घडल्याचा अंदाज पोलिसांनी व्यक्त केला आहे. पण हा हल्ला करणारा प्राणी नेमका कोणता होता? हे अद्याप स्पष्ट झाले नाही. मात्र या घटनेमुळे परिसरात एकच खळबळ माजली आहे. विशेषतः रोजीरोटीसाठी बाहेर गावाहून आलेल्या मजुरांच्या सुरक्षिततेचा प्रश्नही यामुळे गंभीर बनला आहे. त्यामुळे प्रशासनाने या प्रकरणी योग्य ती उपाययोजना करावी अशी मागणी केली जात आहे. दरम्यान, हुडकेश्वर पोलिसांनी घटनास्थळी पंचनामा करून पुढील तपास सुरू केला आहे. वनविभागालाही या घटनेची माहिती देण्यात आली आहे. हे ही वाचा… भाजपने मुंबईसाठी कंबर कसली:परप्रांतीय मतदारांना आकर्षित करण्यासाठी स्टार प्रचारकांची रणनीती; वाचा कुणावर जबाबदारी? भाजपने मुंबई महापालिकेचा गड जिंकण्यासाठी उत्तर भारतीयांची मने जिंकण्याचा प्रयत्न सुरू केला आहे. यासाठी भाजपने महापालिका निवडणुकीच्या प्रचारात हिंदी भाषिक स्टार प्रचारकांना मैदानात उतरवण्याचा निर्णय घेतला आहे. यात उत्तर प्रदेशचे मुख्यमंत्री योगी आदित्यनाथ, आमदार व गायिका मैथिली ठाकूर, मनोज तिवारी यांच्यासह अनेकांचा समावेश असणार आहे. वाचा सविस्तर