बातमी ऐका (Marathi Voice Reader)
विद्यार्थ्यांना वाटप करण्यात आलेल्या परीक्षेच्या पॅडवरील छत्रपती शिवाजी महाराजांच्या फोटोवर भाजप नेत्याच्या फोटोचे स्टिकर चिकटवण्यात आल्याचा संतापजनक प्रकार समोर आला आहे. राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनी यासंबंधीचा एक व्हिडिओ पोस्ट केला आहे. त्यात पॅडवर भाजप नेते तथा विधानपरिषदेचे सभापती राम शिंदे यांचा फोटो असल्याचे दिसून येत आहे. राज्यात येत्या 15 तारखेला मुंबईसह 29 महापालिकांची निवडणूक होणार आहे. यामुळे अवघ्या राज्याचे राजकारण तापले असताना रोहित पवार यांनी छत्रपती शिवाजी महाराज यांच्या कथित अवमाननेशी संबंधित एक व्हिडिओ पोस्ट केला आहे. या व्हिडिओत एक महिला परीक्षेच्या पॅडवर चिकटवलेले एक स्टिकर काढताना दिसत आहे. हे स्टिकर भाजप नेते तथा विधान परिषदेचे सभापती राम शिंदे यांचे आहे. महिलेने ते स्टिकर काढल्यानंतर त्याच्या मागे छत्रपती शिवाजी महाराज यांचा फोटो असल्याचे स्पष्ट होते. रोहित पवार यांनी या घटनेवर तीव्र संताप व्यक्त केला आहे. चमकोगिरी करणाऱ्यांनी माफी मागावी महाराष्ट्राचं आराध्य दैवत छत्रपती शिवाजी महाराज यांच्या फोटोवर माझ्या मतदारसंघात असे स्टीकर चिकटवून ते पॅड विद्यार्थ्यांना देऊन चमकोगिरी केली जात आहे. ही महाराजांची विटंबना असून ज्यांनी केलं आणि ज्यांच्यासाठी केलं ते सगळेच याला जबाबदार आहेत. या प्रकरणी संबंधितांनी तातडीने जाहीर माफी मागावी, असे रोहित पवार यांनी आपल्या पोस्टमध्ये म्हटले आहे. एमपीएससी परीक्षेवरूनही संताप रोहित पवारांनी एमपीएससीच्या विद्यार्थ्यांच्या आंदोलनावरूनही सरकारवर निशाणा साधला आहे. महाराष्ट्र लोकसेवा आयोगाची संयुक्त पूर्व परीक्षा 2025 अवघ्या काही दिवसांवर आली असतानाही PSI वय वाढीचा निर्णय होत नसल्याने विद्यार्थ्यांना नाहक त्रास सहन करावा लागत आहे. अगोदरच जाहिरात 7-8 महिन्यांनी उशिरा त्यात वय वाढीचा मुद्दा देखील सोडवायची तसदी घेतली गेली नाही. वय वाढीच्या निर्णयाबाबत सरकारने गेले आठ दहा दिवस विद्यार्थ्याना अंधारात ठेवले परिणामी नाईलाजाने आज विद्यार्थ्याना आंदोलन करावे लागत आहे. आंदोलन करणाऱ्या विद्यार्थ्यांवर केसेस नोंदवल्या जात असल्याची माहिती मिळताच संबंधित पोलिस अधिकाऱ्यांशी फोनवर बोललो असून विद्यार्थ्यांवर केसेस होऊन त्यांच्या भविष्यावर परिणाम होणार नाही यादृष्टीने पोलीस यंत्रणांनी विचार करण्याची विनंती केली. पोलिस प्रशासन विद्यार्थ्यांना सहकार्य करेल, ही अपेक्षा, असे त्यांनी म्हटले आहे.
