केळापूर तालुका प्रतिनिधी:- सागर मुळे करंजी
पांढरकवडा : येथील बाबासाहेब देशमुख विद्यालय, पहापळ यांनी ५३ व्या जिल्हास्तरीय विज्ञान प्रदर्शनी (२०२५–२६) मध्ये घवघवीत यश संपादन केले आहे. माध्यमिक आदिवासी गटामधून विद्यालयाच्या विद्यार्थिनींनी प्रथम क्रमांक पटकावत आपल्या प्रयोगाची राज्यस्तरीय प्रदर्शनासाठी निवड करून विद्यालयाच्या शिरपेचात मानाचा तुरा रोवला आहे.विशेष म्हणजे सलग दुसऱ्या वर्षी विद्यालयाचा प्रयोग राज्यस्तरावर निवडला गेल्याने विज्ञान शिक्षणातील सातत्यपूर्ण गुणवत्तेची प्रचिती आली आहे.
इयत्ता नववीतील कु. अंबिका महादेव धुडे व कु. स्वराली रितेश कडू या विद्यार्थिनींनी “सोलर पॉवर टेन्ट” हा अत्यंत नाविन्यपूर्ण व समाजोपयोगी प्रयोग सादर केला. लडाखसारख्या अतिथंड प्रदेशांमध्ये तसेच जगातील इतर थंड भागांमध्ये हा प्रयोग उपयुक्त ठरणार आहे. ज्या ठिकाणी रात्रीचे तापमान शून्य अंश सेल्सिअसपेक्षा कमी असते, अशा परिस्थितीतही या टेन्टमध्ये +१० अंश सेल्सिअसपेक्षा अधिक तापमान राखण्याची क्षमता या प्रणालीमध्ये आहे.
या सोलर पॉवर टेन्टची विशेष बाब म्हणजे दिवसा साठवलेली उष्ण ऊर्जा रात्री वापरण्यासाठी कोणत्याही प्रकारची वीज किंवा बॅटरीची आवश्यकता लागत नाही. मार्गदर्शक शिक्षक निलेश लिखार यांच्या मार्गदर्शनाखाली विद्यार्थिनींनी जेलसारखा उष्णता साठवणारा विशेष पदार्थ विकसित केला आहे. हा पदार्थ दिवसा सूर्यऊर्जेच्या साहाय्याने उष्णता साठवतो व रात्री टेन्ट उबदार ठेवण्यासाठी त्याचा वापर केला जातो.
ही प्रणाली सीमेवरील सैनिक, थंड प्रदेशातील नागरिक, पर्यटक, गिर्यारोहक तसेच संशोधकांसाठी अत्यंत उपयुक्त ठरणार आहे. विद्यार्थ्यांमध्ये वैज्ञानिक दृष्टिकोन व संशोधनवृत्ती निर्माण करण्यासाठी निलेश लिखार सातत्याने कार्यरत असून, त्याचेच हे यशस्वी फलित असल्याचे मत व्यक्त होत आहे. या यशामध्ये विज्ञान शिक्षिका कु. शिवानी खडसे यांचेही मोलाचे योगदान लाभले आहे.
या गौरवशाली यशाबद्दल संस्थेचे सचिव सन्माननीय अण्णासाहेब देशमुख पारवेकर यांनी विद्यार्थिनी व मार्गदर्शक शिक्षकांचे मनःपूर्वक अभिनंदन करून राज्यस्तरीय स्पर्धेसाठी शुभेच्छा दिल्या. संस्था निरीक्षण समितीचे अध्यक्ष अनिस खान, सदस्य मोरेश्वर सरोदे, सुनिल ठाकरे, कु. ज्योती अडपावार व शहरिदास कापसे सर यांनी समाधान व्यक्त केले.
विद्यालयाचे मुख्याध्यापक संजय चल्लावार व उपमुख्याध्यापिका कु. ज्योती अडपावार यांच्या मार्गदर्शनाखाली सर्व शिक्षक व शिक्षकेत्तर कर्मचाऱ्यांनी विद्यार्थिनींचे अभिनंदन करून त्यांच्या पुढील वाटचालीस शुभेच्छा दिल्या.
