मारेगाव पोलिसांची सिनेस्टाईल कारवाई
सुरेश पाचभाई मारेगाव
मारेगाव तालुक्यातील लाखापुर येथे स्वतःला एलसीबीचे पोलीस असल्याचे भासवून एका शेतकऱ्यास मारहाण करून त्याच्या वडिलांकडून पैसे उकळल्याची धक्कादायक घटना उघडकीस आली आहे. या प्रकरणी मारेगाव पोलिसांनी अवघ्या एका तासात सिनेस्टाईल पाठलाग करून तीन तोतया पोलिसांना चारचाकी कारसह अटक केली आहे.
Impersonators posing as police officers beat and extorted money; Maregaon police take action in a cinematic style.
याप्रकरणी फिर्यादी मंगेश दिलीप मेश्राम (वय ३०, रा. लाखापुर, ता. मारेगाव) यांनी दिलेल्या तक्रारीनुसार, दिनांक १४ जानेवारी २०२६ रोजी सायंकाळी साडेपाचच्या सुमारास वर्धा नदीवरून आंघोळ करून ते वनोजादेवी बसस्टॉपजवळील हॉटेलमध्ये चहा पिण्यास थांबले होते. त्यावेळी पांढऱ्या रंगाच्या टाटा नेक्सॉन (क्र. MH32 AX 6254) मधून उतरलेल्या तीन इसमांनी स्वतःला एलसीबीचे पोलीस असल्याचे सांगत हुज्जत घातली व फिर्यादीस मारहाण केली.
भीतीपोटी फिर्यादी घरी पळून गेल्यानंतर संबंधित आरोपींनी त्याचा पाठलाग करून घर गाठले व वडिलांना धमकावत कारवाईची भीती दाखवून १५०० रुपये घेतले. नंतर हे आरोपी तोतया पोलीस असल्याचे निष्पन्न झाल्यावर फिर्यादीने मारेगाव पोलीस ठाण्यात तक्रार दाखल केली.
मारेगाव पोलिसांनी तात्काळ कारवाई करत वणी–मारेगाव मार्गावर नाकाबंदी करून मार्डी चौकात चारचाकी कारसह आरोपींना अटक केली. अटक करण्यात आलेल्या संशयित आरोपींमध्ये हर्षल रामेश्वर ठाकरे (वय ३८, रा. आर्वी नाका ता. वर्धा जि. वर्धा), हरीष कैलासराव ठाकरे (वय ३४,रा.रामनगर ता. वर्धा ) व अनंता अजाबराव धोटे (वय ३९, रा. तिरझडा ता.कळंब, जि. यवतमाळ) यांचा समावेश आहे.
या प्रकरणी आरोपींविरोधात भारतीय न्याय संहिता (BNS) कलम 204, 318, 115(2), 352, 3(5) अन्वये गुन्हा दाखल करण्यात आला असून पुढील तपास सहा. पोलीस उपनिरीक्षक दिगंबर किनाके व पोलीस कॉन्स्टेबल सागर दीपेवार हे पोलीस निरीक्षक श्याम वानखेडे व पोलीस उपनिरीक्षक प्रवीण सुळे यांच्या मार्गदर्शनाखाली पुढील तपास करीत आहेत.
दरम्यान, नागरिकांनी कोणतीही व्यक्ती पोलीस असल्याचा दावा करत संशयास्पद वर्तन करत असल्यास त्याची खातरजमा करूनच सहकार्य करावे आणि तत्काळ जवळच्या पोलीस ठाण्याशी संपर्क साधावा, असे आवाहन पोलीस प्रशासनाने केले आहे.
