खातेरा शाळेतील यश भोयरची विमानवारीसाठी निवड
ज्ञानेश्वर आवारी झरी जामणी
झरी जामणी विद्यार्थ्यांमध्ये लहानपणापासूनच स्पर्धा परीक्षांची गोडी निर्माण व्हावी, या उद्देशाने यवतमाळ जिल्हा परिषदेमार्फत घेण्यात येणाऱ्या अभ्यासक्रम व सामान्य ज्ञानावर आधारित महादीप परीक्षा नुकतीच पार पडली.
या परीक्षेत जिल्हा परिषद उच्च प्राथमिक शाळा, खातेरा येथील इयत्ता पाचवीतील विद्यार्थी यश नारायण भोयर याने यश संपादन करत विमानवारीसाठी पात्र ठरण्याचा मान मिळवला आहे.
खातेरा शाळेतील पाच विद्यार्थ्यांनी ही जिल्हास्तरीय परीक्षा दिली होती. त्यामधून यश भोयर याची निवड झाल्याने झरी तालुक्याला महादीप परीक्षेत पहिल्यांदाच यश मिळाले आहे.
या यशामुळे शाळेसह संपूर्ण तालुक्यात आनंदाचे वातावरण आहे.
यशच्या या उल्लेखनीय कामगिरीबद्दल सर्व स्तरांतून त्याच्यावर अभिनंदनाचा वर्षाव होत आहे. या यशामुळे जिल्हा परिषद उच्च प्राथमिक शाळा, खातेराचा नावलौकिक वाढला असून शिक्षकांनी घेतलेल्या सातत्यपूर्ण मेहनतीचे फळ मिळाल्याचे बोलले जात आहे.
मागील वर्षी शाळेतील आठ विद्यार्थ्यांनी जिल्हास्तरीय परीक्षा दिली होती; मात्र अल्प गुणांमुळे विमानवारीची संधी हुकली होती. यंदा यशने ती उणीव भरून काढत शाळेसोबतच गाव व तालुक्याचे नाव उज्वल केले आहे.
यशच्या यशामागे शाळेचे मुख्याध्यापक श्री. आक्केवार सर, विषय शिक्षक जगदीश आरमुरवार, तसेच स्वयंसेवक संगीता कुळसंगे आणि मेघा लसने यांच्या मार्गदर्शन व परिश्रमाचा मोठा वाटा आहे.
