विदर्भ एस.पी. न्यूज नेटवर्कच्या बातमीचा मोठा इफेक्ट
करणवाडी–खैरी रस्त्याच्या दुरुस्तीला सुरुवात
सुरेश पाचभाई | मारेगाव
मारेगाव तालुक्यातील करणवाडी–कुंभा ते खैरी या अत्यंत महत्त्वाच्या रस्त्याच्या दयनीय अवस्थेबाबत विदर्भ एस.पी. न्यूज नेटवर्कने “करणवाडी–खैरी रस्ता मोजतोय अखेरची घटका” ही बातमी प्रसिद्ध केल्यानंतर अखेर प्रशासन हालचालीत आले असून, संबंधित रस्त्याच्या दुरुस्ती व खड्डे बुजवण्याच्या कामाला सुरुवात करण्यात आली आहे.
सदर रस्त्याचे डांबरीकरणाचे काम नुकतेच पूर्ण झाले होते. मात्र अवघ्या काही दिवसातच कुंभा व महादापेठ गावांदरम्यान असलेल्या पुलावर दीड ते साडेतीन फूट खोल खड्डे पडल्याने रस्त्याची अवस्था अत्यंत धोकादायक बनली होती. या मार्गावरून दुचाकी, चारचाकी वाहनांसह एसटी बसची मोठ्या प्रमाणात वाहतूक होत असल्याने अपघाताचा गंभीर धोका बनला होता.
https://spnewsmaregaon.com/?p=39814
हा रस्ता शाळकरी विद्यार्थी, शेतकरी, नोकरदार, व्यापारी तसेच प्रवाशांसाठी जीवनवाहिनी आहे. मात्र रस्त्यावर पडलेल्या भल्यामोठ्या खड्ड्यांमुळे नागरिकांना जीव मुठीत धरून प्रवास करावा लागत होता. रस्त्याच्या कामाच्या निकृष्ट दर्जाबाबत नागरिकांकडून तीव्र संताप व्यक्त करण्यात येत होता.
सदर रस्ता सार्वजनिक बांधकाम विभाग, मारेगाव यांच्या अखत्यारीत येतो. विदर्भ एस.पी. न्यूज नेटवर्कच्या बातमीचा प्रशासनावर दबाव निर्माण झाला आणि त्यानंतर विभागाने तातडीने दखल घेत करणवाडीकडून रस्त्याच्या दुरुस्तीचे काम सुरू केले. त्यामुळे नागरिकांनी काहीअंशी समाधान व्यक्त केले आहे.
मात्र केवळ तात्पुरती डागडूजी न करता दर्जेदार व टिकाऊ स्वरूपाचे काम करण्यात यावे, अशी ठाम अपेक्षा नागरिक व्यक्त करीत आहेत. भविष्यात अशा प्रकारची परिस्थिती पुन्हा उद्भवू नये अशी जोरदार मागणी होत आहे.
वेळीच दखल घेतल्यामुळे संभाव्य अपघात टळण्यास मदत होणार असून, लोकहितासाठी आवाज उठवणाऱ्या विदर्भ एस.पी. न्यूज नेटवर्कच्या प्रभावी पत्रकारितेचे नागरिकांकडून कौतुक होत आहे.
