पुणे जिल्हा परिषदेत ‘राष्ट्रवादी’ची घड्याळ जोरात:एकहाती सत्ता मिळणार? काँग्रेसला शून्य जागा मिळण्याचा अंदाज, ‘प्राब’चा दावा

उपमुख्यमंत्री अजित पवार यांच्या पश्चात पुणे जिल्हा परिषदेत सत्ताधारी राष्ट्रवादी काँग्रेसला एकहाती सत्ता मिळणार असल्याचा दावा ‘पॉलिटिकल रिसर्च अँड अॅनालिसिस ब्युरो’ने (प्राब) आपल्या एक्झिट पोलमध्ये केला आहे. अजित पवार यांचे गत 28 जानेवारी रोजी एका विमान अपघातात निधन झाले. ते पुणे जिल्हा परिषद व पंचायत समितीच्या प्रचारासाठी बारामतीत येत असताना ही दुर्घटना घडली होती. त्यांच्या दुःखद निधनानंतर राष्ट्रवादी काँग्रेसने या निवडणुकीच्या प्रचाराला फूलस्टॉप दिला. त्यानंतर काल झालेल्या निवडणुकीत पुणे जिल्ह्यात सरासरी 69 टक्के मतदान झाले. यात बारामतीत अवघे 54 टक्के मतदान झाले. त्यानंतर आता 9 तारखेला निकाल जाहीर होणार आहेत. या पार्श्वभूमीवर प्राबने आपल्या एक्झिटपोलमध्ये पुणे जिल्हा परिषदेत राष्ट्रवादीची एकहाती सत्ता येण्याची शक्यता व्यक्त केली आहे. एक्झिट पोलचा अंदाज काय? ‘प्राब’च्या एक्झिट पोलनुसार, 73 सदस्यीय पुणे जिल्हा परिषद निवडणुकीत राष्ट्रवादीला सर्वाधिक 47 जागा मिळण्याची शक्यता आहे. त्यानंतर 18 जागांसह भाजप दुसऱ्या क्रमांकावर राहण्याचा अंदाज आहे. याशिवाय उपमुख्यमंत्री एकनाथ शिंदे यांच्या नेतृत्वातील सत्ताधारी शिवसेनेला 6, तर उद्धव ठाकरेंच्या शिवसेनेला एका ठिकाणी विजय मिळू शकतो. धक्कादायक बाब म्हणजे काँग्रेसला या निवडणुकीत भोपळाही फोडता येणार नाही. एका जागेवर अपक्ष उमेदवार निवडून येईल, असा अंदाजही या अहवालात व्यक्त करण्यात आला आहे. निवडणुकीत दोन्ही राष्ट्रवादीची होती युती राष्ट्रवादीच्या दोन्ही गटांनी पुणे महापालिकेनंतर जिल्हा परिषदेची निवडणूकही एकत्र लढली होती. अजित पवार यांच्या नेतृत्वातच हे दोन्ही गट एकत्र आले होते. राष्ट्रवादीचे सर्व उमेदवार घड्याळ एका एकाच चिन्हावर लढले होते. या सर्व उमेदवारांची जबाबदारीही अजित पवारांनी घेतल्याची माहिती होती. अजित पवारांच्या या पुढाकारामुळे दोन्ही राष्ट्रवादींनी एकदिलाने प्रचार सुरू केला होता. पण अजित पवारांच्या अनपेक्षित निधनामुळे या दोन्ही पक्षांना जोरदार झटका बसला. कुठे किती झाले मतदान?