मारेगाव पोलिसांत BNSS कलम १९४ अन्वये आकस्मिक मृत्यूची नोंद; शवविच्छेदन अहवालानंतरच कारण स्पष्ट होणार
सुरेश पाचभाई | मारेगाव
मारेगाव तालुक्यातील मांगली येथे गुरुवारी (दि. १२ फेब्रुवारी) पहाटेच्या सुमारास एका ७८ वर्षीय वृद्धाचा विहिरीत पडून दुर्दैवी मृत्यू झाल्याची हृदयद्रावक घटना उघडकीस आली. महादेव बालाजी गाणफाडे असे मृत वृद्धाचे नाव असून, या घटनेमुळे संपूर्ण गावात शोककळा पसरली आहे.
मिळालेल्या माहितीनुसार, महादेव गाणफाडे हे पहाटे सुमारे ३ वाजताच्या दरम्यान शौचास जाण्यासाठी घराबाहेर पडले होते. बराच वेळ उलटूनही ते घरी परतले नसल्याने कुटुंबीयांनी चिंतेपोटी त्यांचा शोध सुरू केला. शोध घेत असताना घराशेजारील शेतातील विहिरीत त्यांचा मृतदेह पाण्यावर तरंगताना आढळून आला. हे दृश्य पाहून कुटुंबीयांना मोठा धक्का बसला.
घटनेची माहिती मिळताच मारेगाव पोलिसांनी तातडीने घटनास्थळी धाव घेतली. मृतदेह विहिरीतून बाहेर काढून पंचनामा करण्यात आला असून, पुढील तपासासाठी मृतदेह उत्तरीय तपासणीसाठी मारेगाव येथील ग्रामीण रुग्णालयात पाठविण्यात आला आहे.
प्राथमिक माहितीनुसार, मृतक महादेव गाणफाडे हे काही काळापासून मानसिक आजाराने त्रस्त असल्याची चर्चा आहे. मात्र, त्यांच्या मृत्यूमागील नेमके कारण अद्याप स्पष्ट झालेले नसून, शवविच्छेदन अहवाल प्राप्त झाल्यानंतरच याबाबत ठोस माहिती समोर येणार असल्याचे पोलिसांकडून सांगण्यात आले.
या प्रकरणी भारतीय नागरी सुरक्षा संहिता (BNSS) कलम १९४ अन्वये आकस्मिक मृत्यूची नोंद करण्यात आली असून, पोलीस निरीक्षक श्याम वानखेडे व सहाय्यक पोलिस निरीक्षक दिगंबर किनाके यांच्या मार्गदर्शनाखाली मारेगाव पोलीस पुढील तपास करीत आहेत.
एका ज्येष्ठ नागरिकाचा अशा प्रकारे झालेला दुर्दैवी अंत गावकऱ्यांना चटका लावणारा ठरला असून, मांगली परिसरात सर्वत्र हळहळ व्यक्त होत आहे.
