सूरेश पाचभाई मारेगाव,
सकाळी 6 वाजता शौचास जातो म्हणून घरून गेलेली अवघ्या 8 वर्षाची चिमुकली दोन तास झाले तरी घरी परत आली नाही. घरच्यांनी सगळीकडे शोधाशोध केली. शेवटी कुठेही आढळून न आल्याने वडिलांनी मारेगाव पोलीस ठाणे गाठत तक्रार दाखल केली. मारेगाव पोलिसांनी वेगाने चक्रे फिरवीत अवघ्या चार तासात या घटनेचा छडा लावत मुलीला शोधल्याने घरच्यांनी सुटकेचा श्वास सोडला.
सविस्तर वृत्त असे की,
मारेगाव वार्ड नंबर 14 येथील अरुणा संजय मंजुळकर वय 8 वर्ष ही दिनांक 12 मार्च 2024 रोज मंगळवारला सकाळी 6 वाजताच्या दरम्यान शौचास जातो म्हणून कोलगाव रस्त्याने गेली. ती बराच वेळ होऊन घरी परत न आल्यामुळे वडिलांनी परिसरात व नातेवाईकाकडे शोधाशोध घेतला असता तिचा थांगपत्ता लागला नाही. त्यामुळे अखेर वडिलांनी लगेच मारेगाव येथील पोलीस स्टेशन गाठून सदर घटनेची तक्रार दाखल केली.
मारेगाव पोलिसांनी जलद गतीने तपास चक्रे फिरवत अवघ्या 4 तासाच्या आत सदर हरवलेल्या मुलीचा शोध लावला व तिला वडिलांच्या स्वाधीन केले.ठाणेदार शंकर पांचाळ यांचे मार्गदर्शनाखाली पोलिस उप निरीक्षक प्रमोद जिद्देवार,जमदार आनंद आलचेवार,होमगार्ड महेश जूनघरी यांनी शोध मोहीम पूर्ण केली.या घटनेमुळे मारेगाव पोलिसांचे सर्वत्र कौतुक होत आहे.