अजित पवारांचा मृत्यू अपघाती वाटत नाही:काँग्रेस नेते विजय वडेट्टीवार यांनी व्यक्त केला संशय; ब्लॅकबॉक्स बंद असल्याच्या मुद्यावर आक्षेप

काँग्रेस नेते विजय वडेट्टीवार यांनी अजित पवारांच्या विमानाचा ब्लॅकबॉक्स जळाच्या मुद्यावर संशय व्यक्त केला आहे. अजित पवारांच्या अपघाताविषयी वेगवेगळ्या शंकाकुशंका व्यक्त केल्या जात आहेत. या प्रकरणी ब्लॅकबॉक्स खराब झाला किंवा त्यातून काहीही माहिती प्राप्त होत नाही असे म्हटले जाते तेव्हा निश्चितच दाल में कुछ काला हैं असा संशय येतो, असे ते म्हणालेत. अजित पवार यांचे गत 28 जानेवारी रोजी बारामतीत झालेल्या एका विमान अपघातात मृत्यू झाला. तेव्हापासून या अपघाताविषयी संशय व्यक्त केला जात आहे. अनेक नेत्यांनी हा अपघात नसून, घातपात असल्याचा दावा केला आहे. त्यात आता काँग्रेस नेते विजय वडेट्टीवार यांची भर पडली आहे. विजय वडेट्टीवारांनी मंगळवारी या प्रकरणी बोलताना अजित पवारांचा मृत्यू अपघात वाटत नाही असा दावा केला. ते म्हणाले, अजित पवारांचा मृत्यू अपघाती आहे की घातपात आहे याविषयी देशभरात खूप चर्चा सुरू आहे. अजित पवारांचा मृत्यू हा काही अपघात वाटत नाही. याविषयी ज्या काही शंका उपस्थित झाल्यात त्यात काही प्रमाणात तथ्य वाटते. ब्लॅक्सबॉक्स खराब झाला आहे किंवा त्यातून काही माहिती प्राप्त होत नाही असे समोर येते तेव्हा त्याचा अर्थ दाल में कुछ काला हैं असा लावला जातो, असे ते म्हणाले. रुपाली ठोंबरे पाटील यांचाही संताप दुसरीकडे, सत्ताधारी राष्ट्रवादी काँग्रेसच्या नेत्या रुपाली पाटील ठोंबरे यांनीही या प्रकरणी आपला संताप व्यक्त केला आहे. ब्लॅकबॉक्समधील माहिती समोर येत नाही म्हणून तुम्ही तो परदेशात पाठवणार. परत 15-20 दिवस घेणार. नवीन कुठला तरी हा पुरावा सापडत नाही किंवा हे सापडत नाही हे सांगणार. अशा अनेक गोष्टी ज्या आहेत त्या खरेच खूप संशयाच्या आहेत, असे त्यांनी म्हटले आहे. रोहित पवारांचाही अपघातावर संशय उल्लेखनीय बाब म्हणजे राष्ट्रवादीच्या शरद पवार गटाचे आमदार रोहित पवार यांनीही या प्रकरणाच्या संथगतीने होणाऱ्या तपासावर संशय व्यक्त केला आहे. अजित पवारांच्या अपघाताला 20 दिवस झाले, पण अजूनही तपासाला वेग आला नाही. केवळ व्हीएसआर कंपनीला पुरावे नष्ट करता यावेत म्हणून तर उशीर होत नाही ना? की कंपनीला कुणाचा वरदहस्त आहे, हा प्रश्न सर्वसामान्य नागरिकांना पडला आहे. आज ब्लॅकबॉक्स खराब झाल्याबाबत जी काही माहिती समोर येत आहे, त्यावरून मी 5 दिवसांपासून वर्तवलेली शक्यता खरी होताना दिसत आहे. पण आम्ही दादांचा अपघात की घातपात याचे उत्तर मिळवल्याशिवाय स्वस्थ बसणार नाही, असे ते म्हणालेत.