बातमी ऐका (Marathi Voice Reader)
औंढा नागनाथ मंदिर परिसरात रथोत्सवाच्यावेळी महिलांमध्ये फ्रीस्टाईल हाणामारी झाल्याचा व्हिडिओ समोर आला आहे. या प्रकरणात आता औंढा नागनाथ पोलिसांनी सीसीटीव्ही फुटेज सादर करण्याच्या सूचना औंढा नागनाथ संस्थानला शुक्रवारी ता. २० दिल्या आहेत. जागेच्या कारणावरून हाणामारी झाली असावी अशी शक्यता संस्थान प्रशासनाने व्यक्त केली आहे. औंढा नागनाथ येथे महाशिवरात्री निमित्त विविध धार्मिक कार्यक्रम घेण्यात आले. यात्रा महोत्सवाचे मुख्य आकर्षण असलेल्या रथोत्सवाच्या वेळी बुधवारी ता. १८ दुपारपासूनच भाविकांनी मंदिरात गर्दी केली होती. मराठवाड्यासह बाहेर राज्यातील भाविक देखील यावेळी हजर होते. मंदिराच्या परिसरात सुमारे १ लाखापेक्षा अधिक भाविक आल्याचा अंदाज व्यक्त करण्यात आला. रथोत्सवाच्या वेळी झालेली गर्दी पाहता पाय ठेवायलाही जागा शिल्लक राहिली नव्हती. दरम्यान, रथोत्सव सुरु होताच मंदिराच्या परिसरात जमा झालेल्या दोन महिलांमध्ये फ्रिस्टाईल हाणामारीला सुरुवात झाली. एकमेकांचे केस ओढून मारहाणीपर्यंत प्रकरण गेले. यामध्ये इतर दोन ते तीन महिलांनीही मारहाणीत सहभाग घेतला तर एका तरुणाने दुसऱ्या एका तरुणालाही मारहाण करण्यास सुरवात केली. अचानक झालेल्या या मारहाणीच्या प्रकारामुळे काही काळ गोंधळाची स्थिती निर्माण झाली होती. मात्र काही भाविकांनीच मध्यस्थी करून वाद सोडवला. हाणामारीचे व्हिडिओ समाज माध्यमावर व्हायरल दरम्यान, मंदिर परिसरातील हाणामारीचे व्हिडीओ समाज माध्यमावर व्हायरल झाले आहेत. यामध्ये हाणामारी होत असल्याचे दिसून येत आहे. या प्रकरणात आता औंढा नागनाथ पोलिसांनी शुक्रवारी ता. २० तातडीने संस्थान प्रशासनाशी संपर्क साधून घटनेचे सीसीटीव्ही फुटेज सादर करण्याच्या सूचना दिल्या आहेत. या फुटेजवरून त्या महिलांची व तरुणांची ओळख पटवून कारवाई केली जाणार असल्याचे पोलिस विभागाच्या सुत्रांनी सांगितले. तर गर्दीमुळे धक्का लागणे व जागेच्या कारणावरून वाद झाला असावा अशी शक्यता पोलिसांनी व्यक्त केली आहे. वादादरम्यान एकही पोलिस कर्मचारी दिसला नाही सण आणि उत्सवाच्या काळात औंढा नागनाथ मंदिर परिसरात होत असलेली मोठ्या प्रमाणात गर्दी पाहता पोलिसांच्या वतीने चोख बंदोबस्त ठेवण्यात आला असल्याचे सांगण्यात आलं होतं. मात्र या महिलांमध्ये हाणामारी होत असताना 15 ते 20 मिनिटे या परिसरात एकही पोलिस कर्मचारी दिसून आला नाही. अखेर भाविकांनीच हा वाद मिटवला. त्यामुळे पोलिसांच्या एकूणच संरक्षण विषयक नियोजनावर प्रश्नचिन्ह उपस्थित केले जात आहे. गेल्या वर्षी शिवरात्रीच्या दिवशीच भिडले होते सुरक्षा रक्षक आणि भाविक औंढा नागनाथ मंदिरात गेल्या वर्षी शिवरात्रीच्या दिवशीच अशीच एक घटना घडली होती. या ठिकाणी सुरक्षा रक्षक आणि भाविकांमध्ये जोरदार वाद झाला होता. मंदिराच्या दारात गर्दी असल्याने, भाविक आणि सुरक्षा रक्षकांमध्ये चांगला वाद झाला होता. त्याचा व्हिडिओ देखील नंतर व्हायरल झाला होता. या वादामुळे त्या ठिकाणी उपस्थित असलेले भाविक घाबरले होते. या घटनेमुळे मंदिर प्रशासन आणि पोलिस यंत्रणा अधिक जागरूक झाली असल्याचे बोलले जात होते. मात्र, या वर्षी देखील पुन्हा हाणामारीचा व्हिडिओ समोर आला आहे. औंढा नागनाथ मंदिराचा अद्भुत इतिहास आणि महिमा हिंगोली जिल्ह्यातील औंढा नागनाथ मंदिर हे भगवान शंकराचे आठवे आणि आद्य ज्योतिर्लिंग मानले जाते. बारा ज्योतिर्लिंगांमध्ये या मंदिराला विशेष स्थान असून ते धार्मिक, आध्यात्मिक आणि ऐतिहासिक दृष्ट्या अत्यंत महत्त्वाचे मानले जाते. नागनाथ या नावाने प्रसिद्ध असलेल्या या देवस्थानाबाबत भाविकांमध्ये अशी श्रद्धा आहे की येथे दर्शन घेतल्यास सर्व प्रकारच्या विषबाधेपासून संरक्षण मिळते. महाभारत काळात पांडवांनी आपल्या 14 वर्षांच्या वनवासादरम्यान या मंदिराची उभारणी केली, अशी पौराणिक मान्यता आहे. पुढे यादव काळात, साधारण 13 व्या शतकात मंदिराची पुनर्बांधणी झाल्याचे सांगितले जाते. हेमाड स्थापत्यशैलीचे उत्कृष्ट उदाहरणपंती हे मंदिर हेमाडपंती स्थापत्यशैलीचे उत्कृष्ट उदाहरण मानले जाते. भव्य रचना आणि बारकाईने केलेले कोरीव काम पाहणाऱ्यांचे लक्ष वेधून घेते. या मंदिराशी संत नामदेवांची एक प्रसिद्ध आख्यायिका जोडलेली आहे. संत नामदेवांना मंदिरात प्रवेश नाकारण्यात आल्याने त्यांनी मंदिराच्या पाठीमागे बसून कीर्तन केले. त्यांच्या भक्तीने प्रसन्न होऊन मंदिरानेच आपले मुख त्यांच्या दिशेने फिरवले, अशी कथा सांगितली जाते. त्यामुळे औंढा नागनाथ मंदिर श्रद्धा, इतिहास आणि भक्तीचा अद्वितीय संगम मानला जातो.
