बोरी (गदाजी)ची थरारक गोटमार दणदणीत संपन्न
सुरेश पाचभाई मारेगाव
मारेगाव तालुक्यातील बोरी (गदाजी)येथे धुलीवंदनाच्या पार्श्वभूमीवर पारंपरिक आणि अंगावर शहारे आणणारी गोटमार यात्रा लाखोंच्या जनसागरात उत्साहात पार पडली. दगडांच्या वर्षावात श्रद्धा, परंपरा आणि धाडसाचा अद्वितीय संगम अनुभवण्यासाठी राज्यासह लगतच्या राज्यांतून भाविकांनी अभूतपूर्व गर्दी केली. संपूर्ण गाव अक्षरशः दणाणून गेले होते.
संतभूमीत भक्तांची उसळलेली लाट
गावालगत वाहणाऱ्या नाल्याच्या काठावर वसलेल्या श्री संत गदाजी महाराज मंदिर परिसरात सकाळपासूनच भाविकांची रेलचेल होती. अनेक वर्षांची परंपरा लाभलेली ही गोटमार यात्रा राज्यभर प्रसिद्ध असून श्रद्धेचे अनोखे प्रतीक मानली जाते.
मढ मिरवणुकीनंतर थराराला सुरुवात
सकाळी कबड्डीच्या सामन्याने कार्यक्रमाची रंगत वाढवली. त्यानंतर गावातून जिवंत व्यक्तीची प्रतीकात्मक अंत्ययात्रा — ‘मढ मिरवणूक’ — काढण्यात आली. या परंपरेने वातावरणात कुतूहल आणि रोमांच दाटून आले.
सकाळी अकराच्या सुमारास गोटमारला प्रारंभ होताच एकच जल्लोष उसळला. मंदिराशेजारी उभारलेल्या मचानावर सज्ज भाविक आणि खाली उभे असलेले ग्रामस्थ यांच्यात दगडफेक सुरू झाली. मचानावरून जमिनीवर आणि जमिनीवरून मचानाकडे होणाऱ्या दगडांच्या वर्षावाने परिसरात थरारक दृश्य निर्माण झाले. सुमारे दीड तास चाललेल्या या परंपरागत ‘खेळा’त काही भाविक किरकोळ जखमी झाले.
विशेष म्हणजे, एखादा भक्त दगड लागून कोसळल्यास तत्काळ खेळ थांबवून त्याला मंदिरात नेले जाते. तेथे ‘रक्षा’ लावल्यानंतर जखमी भक्त बरा होतो, अशी ग्रामस्थांची अढळ श्रद्धा आहे.
तीन दिवसांचा भव्य महोत्सव
मंगळवार, ३ मार्च २०२६ पासून यात्रेच्या महोत्सवाला सुरुवात झाली असून हा उत्सव तीन दिवस रंगणार आहे. शुक्रवार, ६ मार्च रोजी महाप्रसादाचे आयोजन करण्यात आले आहे. देवस्थान समिती व ग्रामस्थांनी भाविकांना मोठ्या संख्येने उपस्थित राहून दर्शन व यात्रेचा लाभ घ्यावा, असे आवाहन केले आहे.
श्रद्धा, परंपरा आणि धाडसाचा संगम असलेली बोरी (गदाजी)ची गोटमार यात्रा यंदाही दणदणीत आणि जल्लोषात पार पडली. परिसरात या सोहळ्याची जोरदार चर्चा रंगली असून भक्तांच्या उत्साहाने संतभूमी पुन्हा एकदा निनादली आहे.
