पहलगाम पीडित कुटुंबातील आसावरी जगदाळेंना प्रशासकीय नोकरी:CM देवेंद्र फडणवीसांकडून मोठा आधार, महापौरांच्या हस्ते नियुक्तीपत्र प्रदान

पहलगाम हल्ल्यातील पीडित कुटुंबाला मुख्यमंत्री देवेंद्र फडणवीस यांनी मोठा दिलासा दिला असून, त्यांच्या विशेष पुढाकाराने आसावरी जगदाळे यांना पुणे महानगरपालिकेत वर्ग-2 च्या प्रशासकीय अधिकारी पदावर नियुक्ती देण्यात आली आहे. मुख्यमंत्र्यांच्या आदेशानुसार पुणे महापालिका आयुक्त नवलकिशोर राम यांनी या नियुक्तीबाबत विशेष आदेश जारी केले असून, आज दुपारी महापौरांच्या हस्ते जगदाळे यांना हे नियुक्तीपत्र अधिकृतपणे प्रदान करण्यात आले. या संदर्भात मुख्यमंत्री कार्यालयाने ट्विट करत माहिती दिली की, पहलगाम हल्ल्यात मृत झालेल्या संतोष जगदाळे यांची मुलगी आसावरी जगदाळे हिला शासकीय नोकरी देण्याचे आश्वासन मुख्यमंत्री देवेंद्र फडणवीस यांनी दिले होते. आज पुणे महापौरांच्या हस्ते त्यांना ते नियुक्तीपत्र प्रदान करण्यात आले. सरकारी नियमानुसार, त्यांना वर्ग 3 किंवा 4 ची नियुक्ती मिळू शकली असती. परंतू मुख्यमंत्री देवेंद्र फडणवीस यांनी विशेष पुढाकार घेत, तिला शासन नियमाचा अपवाद करीत एक विशेष बाब म्हणून वर्ग-2 ची नियुक्ती देण्याचे आदेश पुणे महापालिका आयुक्तांना दिले. त्यानुसार, आज आसावरी जगदाळे यांना पुणे महानगरपालिकेत प्रशासकीय अधिकारी म्हणून नियुक्तीपत्र देण्यात आले. पहलगाम दहशतवादी हल्ल्यात वडिलांचे निधन झाल्यानंतर आसावरी जगदाळे यांना शासकीय नोकरी मिळावी, अशी मागणी सातत्याने केली जात होती. उच्चशिक्षित असलेल्या आसावरी यांनी प्रशासनात काम करण्याची तयारी आधीच दर्शवली होती, मात्र काही तांत्रिक कारणांमुळे या नियुक्ती प्रक्रियेला बराच विलंब झाला. या दिरंगाईमुळे जगदाळे कुटुंबीयांनी वेळोवेळी आपली नाराजीही व्यक्त केली होती, ज्यामुळे हा विषय प्रशासकीय स्तरावर चर्चेत राहिला होता. या प्रकरणाची दखल घेत उपमुख्यमंत्री एकनाथ शिंदे यांनी संबंधित अधिकाऱ्यांना निर्णय प्रक्रियेला गती देण्याचे आदेश दिले, तर मुख्यमंत्री देवेंद्र फडणवीस यांनीही विशेष हस्तक्षेप करत हा विषय तातडीने मार्गी लावला. प्रशासनाने स्पष्ट केले आहे की, हे ‘विशेष प्रकरण’ असले तरी आसावरी यांची नियुक्ती पूर्णपणे नियमांच्या चौकटीत राहूनच करण्यात आली आहे. त्यांना पुणे महानगरपालिकेत वर्ग-2 चे महत्त्वाचे पद देण्यात आले असून, नियम आणि संवेदनशीलता यांचा योग्य समतोल या निर्णयातून दिसून येत आहे. अखेर नियुक्तीपत्र मिळाल्यानंतर मुख्यमंत्री देवेंद्र फडणवीस यांनी स्वतः फोन करून आसावरी यांचे अभिनंदन केले, ज्यावर जगदाळे कुटुंबीयांनी सरकारचे आभार मानत आता आपली कोणतीही तक्रार नसल्याचे सांगितले. ही नियुक्ती केवळ एका कुटुंबाला मिळालेला आधार नसून, दहशतवादी हल्ल्यातील पीडितांच्या पाठीशी सरकार खंबीरपणे उभे असल्याचे एक मोठे उदाहरण आहे. आसावरी जगदाळे आता लवकरच आपल्या नव्या प्रशासकीय जबाबदाऱ्या स्वीकारणार असून त्यांच्या या नव्या प्रवासाकडे सर्वांचे लक्ष लागले आहे.