सार्वजनिक आरोग्य विभागाच्या आरोग्य उपकेंद्रामध्ये कार्यरत असलेल्या अंशकालीन महिला परिचरांच्या मासिक मानधनात दुप्पट वाढ करण्याचा महत्त्वपूर्ण निर्णय सार्वजनिक आरोग्य विभागाने घेतला आहे. 1 एप्रिल 2026 पासून 6 हजार रुपये मानधन मिळणार आहे. राज्यातील आरोग्य उपकेंद्रातील अंशकालीन महिला परिचर गाव पातळीवर, आदिवासी, दुर्गम, डोंगराळ भागात प्राथमिक स्वरुपाच्या आरोग्य सेवा तळागाळापर्यंत पोहोचवण्यासाठी मदत करतात. तसेच आरोग्य विभागाकडून राबविण्यात येणाऱ्या विविध आरोग्यविषयक कार्यक्रमांचा लाभ प्रत्येक कुटुंबापर्यंत पोहचविण्यातही त्या महत्वाची भूमिका बजावत असतात. त्यांच्या कामाचे स्वरुप पाहता त्यांच्या मानधनात वाढ करण्याची मागणी लोकप्रतिनिधी व संघटना कडूनही होत होती. या परिचरांना 2019 च्या शासन निर्णयानुसार दरमहा 3 हजार रुपये मानधन अदा करण्यात येत होते. महिला परिचरांच्या कामाचे बदलते स्वरूप, आरोग्य सेवेतील वाढती भूमिका आणि वाढत्या महागाईचा विचार करता आरोग्य विभागाने पुढाकार घेऊन महिला परिचरांच्या मासिक मानधनात 3 हजार रुपये वाढ करण्याचा निर्णय घेतला असून, आता त्यांना सध्याचे तीन हजार आणि प्रस्तावित वाढ तीन हजार रुपये असे एकूण सहा हजार रुपये मासिक मानधन 1 एप्रिल 2026 पासून देण्यात येणार आहे. सर्व जिल्हा परिषदांनी अंशकालीन महिला परिचरांना प्रचलित कार्यपद्धतीनुसार सुधारित मासिक मानधन देण्याची कार्यवाही करावी. तसेच दरमहा 10 तारखेपर्यंत मासिक मानधनाची रक्कम अदा करण्याची कार्यवाही करावी अशा सूचना देण्यात आल्या आहेत. या निर्णयामुळे राज्यभरातील अंशकालीन महिला परिचर यांच्याकडून समाधान व्यक्त होत आहे.
सार्वजनिक आरोग्य विभागाचा मोठा निर्णय:अंशकालीन महिला परिचरांच्या मानधनात दुप्पट वाढ, दरमहा मिळणार 6 हजार रुपये
Ad Banner
Show Comments (0)
Hide Comments (0)
Subscribe
Login
0 Comments
Oldest
