बातमी ऐका (Marathi Voice Reader)
नाशिकच्या भोंदूबाबा अशोक खरातला कॅप्टन म्हणू नका, असे आवाहन माजी खासदार संभाजीराजे छत्रपती यांनी केले आहे. अशोक खरात हा देशाच्या सैन्य दलात किंवा नौदलात नव्हता. त्यामुळे त्याच्या नावापुढे कॅप्टन लावू नका, असे ते म्हणालेत. अशोक खरात हा सध्या महिलांचे लैंगिक शोषण केल्याप्रकरणी तुरुंगाची हवा खात आहे. त्याने 100 हून अधिक महिलांना भीती दाखवून, धमक्या देऊन अत्याचार केल्याची माहिती पुढे आली आहे. त्याच्या या दुष्कृत्याचे अनेक व्हिडिओ पोलिसांच्या हाती लागलेत. त्यामुळे त्याचा कोठडीतील मुक्काम वाढण्याची शक्यता आहे. विशेष म्हणजे हा भोंदूबाबा आपण नौदलातील कॅप्टन असल्याचे सांगायचा. पण संभाजीराजे छत्रपती यांनी हा व्यक्ती सैन्यदल किंवा नौदलात कॅप्टन नव्हता, त्यामुळे त्याला कॅप्टन म्हणण्याची काहीही गरज नाही असे ठणकावून सांगितले आहे. काय म्हणाले संभाजीराजे छत्रपती? संभाजीराजे छत्रपती यांनी एका पोस्टमध्ये म्हटले आहे की, “कॅप्टन” हे भारतीय लष्करातील अत्यंत सन्मानाचे पद आहे. या पदापर्यंत पोहोचणारा व्यक्ती अतिशय मेहनतीने, जिद्दीने व प्रखर राष्ट्रभक्तीने इथेपर्यंत पोहोचत असतो. भारतीय सेनादलांत या पदावर सेवा बजावणाऱ्या किंवा या पदावरून निवृत्त झालेल्या व्यक्तींनाचा नावासोबत “कॅप्टन” हे पद जोडण्याचा अधिकार असतो. सर्व जनतेला आणि विशेषत: माध्यमांना माझी विनंती आहे की, घृणास्पद कृत्ये करणाऱ्या भोंदूच्या नावापुढे कुठेही हे पद लावू नये. हा भोंदूबाबा कधीही आपल्या सैन्यदलात अथवा नौदलात नव्हता. कधीकाळी व्यावसायिक व्यापारी जहाजांवर कर्मचारी असलेला हा व्यक्ती स्वयंघोषित कॅप्टन आहे. त्याने स्वतःला लावून घेतलेली खोटी पदवी आपण संमत करून नकळत आपल्या सैन्यदलांचा अपमान करू नये, असे ते म्हणालेत. अशोक खरातकडे उच्चशिक्षित महिला यायच्या दुसरीकडे, भोंदू अशोक खरातकडे उच्चशिक्षित महिला येत असल्याचीही बाब समोर आली आहे. यासंबधी पत्रकार दत्तात्रय खेमनार यांनी ‘मुंबई तक’शी बोलताना सांगितले आहे की, अशोक खरातकडे येणाऱ्या महिला उच्चशिक्षित, सरकारी अधिकारी व राजकीय कुटुंबातील होत्या. तो या महिलांना म्हणायचा की मी देव आहे. तुझे आयुष्य चांगले करायचे असेल तर मला तुझे योनी शुद्धीकरण करावे लागेल. त्यासाठी तो त्या महिलेला स्वतःची लघवी प्यायला लावायचा. एका व्यावसायिकाला व्यवसायात तोटा झाल्यानंतर तो मार्गदर्शनासाठी अशोक खरातकडे आला होता. त्याला खरातने खोटी रत्ने देऊन फसवले. त्याला प्रथम साडेतीन लाख रुपयांना एक रत्न विकले. त्यानंतर दुसरे रत्न दोन लाखांना विकले. पण ही दोन्ही रत्ने खोटी निघाली. हा व्यक्ती त्याच्याकडे येणाऱ्या स्त्री – पुरुषांनाही एकमेकांशी लैंगिक संबंध ठेवायला सांगायचा. खरातने एका बड्या उद्योजकाचे सूत दुसऱ्या एका महिलेशी जुळवू दिले. त्यानंतर ही महिला गरोदर राहिल्याचे खोटे सांगून त्याने त्या उद्योजकाकडून तब्बल 20 कोटी उकळले, असे खेमनार यांनी सांगितले.
