ज्ञानगिरी बाबा मठ वास्तुशांतीनिमित्त भक्तांचा महासागर उसळणार!
सुरेश पाचभाई, मारेगाव
मारेगाव तालुक्यातील निर्गुणा नदीच्या पवित्र तीरावर वसलेले वेगांव येथे दिनांक ५ व ६ एप्रिल रोजी भक्ती, श्रद्धा आणि परंपरेच्या महासागरात अक्षरशः बुडून जाणार आहे. संत परंपरेचा दिव्य वारसा लाभलेल्या या भूमीत प्रथमच इतक्या भव्य स्वरूपात ‘महाकाला’ सोहळा रंगणार असून, संपूर्ण परिसरात सध्या उत्साहाची लाट उसळली आहे.
श्री क्षेत्र संत सद्गुरु ज्ञानगिरी बाबा आणि संत जगन्नाथ महाराज यांच्या पावन स्मृतींनी पवित्र झालेल्या या गावात उभारण्यात आलेल्या भव्य ज्ञानगिरी बाबा मठाची वास्तुशांती सोहळा म्हणजे भक्तांसाठी एक पर्वणी ठरणार आहे. जनसहभागातून उभा राहिलेला हा मठ श्रद्धा आणि एकतेचे जिवंत प्रतीक ठरत आहे.
या ऐतिहासिक सोहळ्याची सुरुवात ५ एप्रिल रोजी घटस्थापना व होम-हवनाने होणार असून, संध्याकाळी हरीपाठ व सामुदायिक प्रार्थना वातावरण भारावून टाकतील. रात्री कीर्तन व वारकरी भजनाच्या सुरांनी गाव दुमदुमून जाईल. ६ एप्रिल रोजी सकाळी १० वाजता कीर्तनानंतर दहीहंडी ‘महाकाला’चा थरार रंगणार असून, त्यानंतर महाप्रसादाचा लाभ हजारो भाविकांना मिळणार आहे.
मठाची वास्तुशांती प्रभुजी वरडोळे महाराज यांच्या शुभहस्ते पार पडणार असून, त्यांच्या उपस्थितीमुळे सोहळ्याला अधिक आध्यात्मिक तेज लाभणार आहे.
परंपरेची थरारक गाथा
वेगांवची माती संत परंपरेच्या चमत्कारांनी नटलेली आहे. संत जगन्नाथ महाराज यांच्या आई जिजाबाई यांचे माहेर याच गावातील टोंगे घराण्यात होते. अशी श्रद्धा आहे की, संत ज्ञानगिरी बाबा यांनी जिजाबाईंना दिलेल्या “तुझ्या पोटी महापुरुष जन्म घेईल” या आशीर्वादाची साक्ष पुढे संत जगन्नाथ महाराजांच्या रूपाने जगाने पाहिली. हीच परंपरा आजही भाविकांच्या मनात अढळ विश्वास निर्माण करते.
भक्तांसाठी ग्रामस्थांचे जाहीर आवाहन
या ऐतिहासिक ‘महाकाला’ सोहळ्यासाठी हजारो भाविक वेगांवकडे धाव घेणार असल्याचा अंदाज व्यक्त होत असून, गावकऱ्यांनी सर्वांना तन, मन आणि धनाने सहभागी होण्याचे आवाहन केले आहे. वेगांव सध्या सज्ज झाले असून, प्रत्येक रस्ता, प्रत्येक घर भक्तीच्या प्रकाशाने उजळून निघाले आहे.
स्थळ: संत सद्गुरु श्री ज्ञानगिरी बाबा मठ, वेगांव (वार्ड क्र. २)
दिनांक: ५ व ६ एप्रिल २०२६
