सलून चालकाच्या मुलीची यवतमाळ पोलीस दल मध्ये दमदार एन्ट्री
सुरेश पाचभाई, मारेगाव
मारेगाव तालुक्यातील हिवरी या छोट्याशा गावातून एक प्रेरणादायी यशोगाथा समोर आली असून, अत्यंत साध्या व गरीब कुटुंबातील कु. समीक्षा विलास हनुमंते हिने जिद्द, चिकाटी आणि कठोर परिश्रमाच्या जोरावर यवतमाळ येथील पोलीस दलात ‘ओपन’ प्रवर्गातून स्थान मिळवत गावासह तालुक्याचे नाव उज्ज्वल केले आहे.
काल उशिरा जाहीर झालेल्या निवड यादीत समीक्षाचे नाव झळकताच गावात आनंदाची लाट उसळली. सलून व्यवसाय करून कुटुंबाचा उदरनिर्वाह करणाऱ्या वडिलांची मुलगी पोलीस खात्यात दाखल होत असल्याने गावकऱ्यांनी अभिमान व्यक्त केला.
समीक्षाने प्राथमिक शिक्षण जिल्हा परिषद शाळा, हिवरी येथे पूर्ण केले.
त्यानंतर नवरगाव येथील पंचशील विद्यालयातून दहावीपर्यंत शिक्षण घेतले. पुढे मारेगाव येथील कला, वाणिज्य व विज्ञान महाविद्यालयातून बारावी उत्तीर्ण झाली. शिक्षणाची वाट कायम ठेवत तिने वणी येथील लोकमान्य टिळक कॉलेज (ओपन युनिव्हर्सिटी) मधून पदवी प्राप्त केली.
वणी येथे वास्तव्यास राहून तिने स्पर्धा परीक्षांची तयारी सुरू ठेवली. आर्थिक परिस्थिती मर्यादित असतानाही मोठे स्वप्न आणि त्यासाठीची अथक मेहनत यामुळेच तिने हे यश संपादन केले आहे.अनेक अडचणींवर मात करत अखेर तिच्या कष्टांना यश मिळाले आणि काल जाहीर झालेल्या यादीत तिची पोलीस दलात निवड झाली. या यशामुळे परिसरात आनंदाचे वातावरण निर्माण झाले असून विविध स्तरांतून तिच्यावर अभिनंदनाचा वर्षाव होत आहे.
“जिद्द आणि परिश्रमाच्या जोरावर कोणतीही अडचण मात करता येते,” हे समीक्षाने आपल्या यशातून दाखवून दिले आहे. हिवरीच्या या लेकीने केवळ आपल्या कुटुंबाचाच नव्हे, तर संपूर्ण तालुक्याचा सन्मान उंचावला आहे.
