दुचाकीस्वाराला लक्ष्य करत ३ लाखांवर डल्ला; मारेगाव तालुक्यात खळबळ
सुरेश पाचभाई मारेगाव
मारेगाव तालुक्यातील ग्राम मछिंद्रा ते बांबर्डा दरम्यान असलेल्या फिस्की जंगल परिसरात सोमवारी (दि. ६ एप्रिल) रात्री सुमारे ८.५० वाजताच्या सुमारास तीन अज्ञात इसमांनी दुचाकीस्वाराला अडवून त्याच्याकडील ३ लाख रुपये व कागदपत्रे हिसकावून नेल्याची घटना घडली आहे.
याबाबत मिळालेल्या माहितीनुसार, फिर्यादी चेतन विजय चिंचोलकर (वय २५, रा. चोपन, ता. मारेगाव) हे वणी येथून जमीन खरेदीसाठी ३ लाख रुपये उसने घेऊन मोटारसायकलने नांदेपेरा मार्गे मार्डीकडे येत होते. दरम्यान, मछिंद्रा–बांबर्डा मार्गावरील हनुमान मंदिराजवळील जंगल परिसरात मागून आलेल्या रेसर बाईकवरील तिघा अज्ञात इसमांनी त्यांना लक्ष्य केले.
त्यातील एका इसमाने फिर्यादीच्या मोटारसायकलच्या सायलेंसरला लाथ मारल्याने त्यांचा तोल गेला. त्याच वेळी दुसऱ्या इसमाने मोटारसायकलच्या पेट्रोल टाकीवर ठेवलेली ३ लाख रुपये व कागदपत्रे असलेली कापडी पिशवी हिसकावून घेतली. घटनेदरम्यान फिर्यादीला धक्का लागून त्यांची दुचाकी रस्त्याच्या कडेला पडली. आरोपी घटनास्थळावरून मार्डीच्या दिशेने पसार झाले.
या प्रकरणी मारेगाव पोलीस ठाण्यात भारतीय न्याय संहिता (BNS) कलम ३०९ (४) अन्वये गुन्हा नोंद करण्यात आला असून पुढील तपास प्रभारी पोलीस निरीक्षक गोपाल उंबरकर,पोलीस उपनिरीक्षक प्रविण सुळे, सहाय्यक पोलीस निरीक्षक दिगंबर किनाके, पोलीस चालक अतुल सरोदे करीत आहेत.
पोलीसांनी नागरिकांना रात्रीच्या वेळी मोठी रोकड वाहून नेताना खबरदारी घेण्याचे आवाहन केले आहे.
