भोंदू खरातच्या कार्यालयाची पुन्हा झाडाझडती:विशिष्ट औषधाची बाटली, कुजलेले पेढे, आतल्या कडीवर खरातच्याच हातांचे ठसे

भोंदू अशोक खरात प्रकरणाचा तपास करणाऱ्या विशेष तपास पथकाने पुन्हा एकदा खरातच्या कुख्यात कार्यालयाची झडती घेतली आहे. त्यात त्यांनी खरातविरोधात भक्कम पुरावे गोळा केलेत. या पुराव्यांच्या न्यायवैद्यक अहवालानुसार खरातच्या कार्यालयात आढळलेली विशिष्ट औषधाची बाटली, कुजलेले पेढे व केबिनच्या दरवाजाच्या आतील कडीवर खरातच्याच हातांचे ठसे आढळलेत. विशेष म्हणजे पीडित महिलांसोबत भोंदू खरातची झटापट झाल्याचे कोणतेही पुरावे नसल्याचे या अहवालात नमूद असल्याचा दावा सूत्रांनी केला आहे. भोंदू अशोक खरातवर अनेक महिलांचे लैंगिक शोषण केल्याचा आरोप आहे. त्याचे अनेक व्हिडिओ सोशल मीडियात व्हायरल झाले आहे. खरातशी कथित संबंध असल्याच्या संशयावरून रुपाली चाकणकर यांना राज्य महिला आयोगाच्या अध्यक्षपदाचा व राष्ट्रवादी काँग्रेसच्या महिला प्रदेशाध्यक्षपदाचा राजीनामा द्यावा लागला आहे. चाकणकरांशिवाय इतरही अनेक राजकारण्यांची नावे खरातशी जोडली जात आहे. त्यामुळे या प्रकरणाची कसून चौकशी करण्याची मागणी केली जात आहे. या पार्श्वभूमीवर एसआयटीने शुक्रवारी अशोक खरातच्या कार्यालयाची झाडाझडती घेतल्याची माहिती पुढे आली आहे. खरातविरोधात एसआयटीकडे भक्कम पुरावे एसआयटीने अशोक खरातच्या कार्यालयातील अनेक गोष्टी जप्त केल्यात. यात अशोक खरात आपल्या भक्तांना देत असलेल्या विशिष्ठ औषधाची बाटली, कुजलेले पेढे, सॅनेटायझरची बाटली आदींचा समावेश आहे. या सर्व वस्तूंसह कार्यालयाच्या दरवाजाच्या आतील कडीवर खरातच्या हातांचे ठसे आढळले आहेत. खरात याच वस्तूंचा वापर करून पीडित महिलांना आपण सांगू ते करण्यास भाग पाडत होता, असा संशय आहे. या वस्तूंवर पीडित महिलांच्या हातांचे ठसे आढळले नाहीत. पण खरातने पीडितांवर अत्याचार करण्याचा प्रयत्न केल्याचे अन्य काही पुरावे एसआयटीच्या हाती लागलेत. हेच पुरावे अशोक खरातला दोषी ठरवण्यासाठी महत्त्वाचे ठरतील असा दावा केला जात आहे. खरातवर तब्बल 16 गुन्हे, 8 बलात्काराचे उल्लेखनीय बाब म्हणजे भोंदू अशोक खरातवर शिर्डी, सिन्नर, नाशिक आदी वेगवेगळ्या भागांत तब्बल 16 गुन्हे दाखल झालेत. यात लैंगिक अत्याचाराशी संबंधित तब्बल 8 गुन्ह्यांचा समावेश आहे. सध्या खरात पोलिस कोठडीत आहे. त्याची कोठडी सोमवारी संपणार असल्यामुळे त्याला उद्या पुन्हा कोर्टात हजर केले जाणार आहे. त्याचे काळे कारनामे पाहता त्याच्याभोवती चौकशीचा फास घट्टपणे आवळला जावा, यासाठी तपास यंत्रणेने अधिक खबरदारी घेतली आहे. अशोक खरातची पत्नी कल्पना अद्याप फरार दुसरीकडे, अशोक खरातची पत्नी कल्पना अद्याप फरार आहे. गत 10 दिवसांपासून पोलिस तिचा शोध घेत आहेत. पण अद्याप ती हाती लागली नाही. पोलिसांनी या प्रकरणी कल्पनाच्या माहेरी जाऊन विचारपूस केली. तसेच तिच्या नातलगांचीही झाडाझडती घेतली. पण तिचा कोणताही थांगपत्ता अजून लागला नाही. त्यामुळे फरार कल्पना कुठे आहे? हे अद्याप स्पष्ट झाले नाही.