बातमी ऐका (Marathi Voice Reader)
महाराष्ट्राच्या राजकीय इतिहासात आजचा १९ जून हा दिवस अत्यंत ऐतिहासिक आणि मैलाचा दगड ठरणारा ठरला आहे. शिवसेना उद्धव बाळासाहेब ठाकरे पक्षाला तब्बल चार वर्षांनंतरचा सर्वात मोठा धक्का देत उपमुख्यमंत्री एकनाथ शिंदे यांचे ‘ऑपरेशन टायगर’ यशस्वी झाल्याची चर्चा आहे. ठाकरे गटाच्या ६ विद्यमान खासदारांनी पक्षाचा ‘व्हिप’ धुडकावून गुरुवारी दिल्लीतील संसदीय दलाच्या बैठकीला दांडी मारली आणि एकनाथ शिंदे यांच्या नेतृत्वावर जाहीर विश्वास दाखवला. या अभूतपूर्व आणि ऐतिहासिक राजकीय भूकंपाच्या पार्श्वभूमीवर, आज शिवसेना शिंदे गटाचा ६० वा वर्धापन दिन सोहळा गोरेगाव येथील भव्य ‘नेस्को सेंटर’मध्ये उत्साहात आणि प्रचंड शक्तीप्रदर्शनासह साजरा होत आहे. उपमुख्यमंत्री एकनाथ शिंदे यांच्या नेतृत्वाखालील शिवसेनेने या वर्धापन दिनाचे औचित्य साधून मुंबईत भव्य वातावरणनिर्मिती केली आहे. मुंबई, ठाणे आणि उपनगरांसह संपूर्ण राज्याचे लक्ष गोरेगावच्या ‘नेस्को’कडे वेधले गेले आहे. सोहळ्यासाठी नेस्को सेंटरमध्ये अत्यंत देखणी, भव्य आणि तितकीच आक्रमक डिजिटल तसेच पारंपरिक सजावट करण्यात आली आहे. मुंबईच्या प्रमुख महामार्गांवर, चौकाचौकात ‘खऱ्या’ आणि ‘सक्षम’ शिवसेनेचा संदेश देणारे महाकाय बॅनर्स झळकत आहेत. ‘त्या’ ६ बंडखोर खासदारांच्या जाहीर पक्षप्रवेशाची उत्सुकता! आजच्या सोहळ्याचे सर्वात मोठे आकर्षण आणि वैशिष्ट्य म्हणजे ठाकरे गटातून बंडखोरी केलेले ‘ते’ ६ खासदार. गेल्या काही दिवसांपासून मुख्यमंत्री एकनाथ शिंदे यांच्या थेट संपर्कात असलेले हे खासदार आज नेस्को सेंटरच्या मुख्य व्यासपीठावर जाहीरपणे उपस्थित राहणार आहेत. दिल्लीतील बैठकीला अनुपस्थित राहून बंडखोरीवर शिक्कामोर्तब केल्यानंतर, हे सर्व खासदार मुख्यमंत्री एकनाथ शिंदे यांच्या उपस्थितीत अधिकृतपणे शिवसेनेत (शिंदे गट) प्रवेश करणार असल्याचे जवळपास निश्चित मानले जात आहे. हा प्रवेश केवळ राज्याच्याच नव्हे, तर देशाच्या राजकारणाला नवी दिशा देणारा ठरणार आहे. शिंदे यांच्या पक्षाचे पोस्टर एकनाथ शिंदे यांच्या पक्षाच्या वर्धापनदिनाचे पोस्टर नुकतेच प्रसिद्ध करण्यात आले. या पोस्टरमध्ये ‘जनात शिवसेना, मनात शिवसेना’ असे लिहिण्यात आले आहे. तसेच या फोटोमध्ये शिवसेनेचा डरकाळी फोडणारा सिंह, शिवसेना पक्षाचे निवडणूक चिन्ह, बाळासाहेब ठाकरे, आनंद दिघे, छत्रपती शिवाजी महाराज यांचा फोटो लावण्यात आला आहे. या पोस्टरमध्ये उपमुख्यमंत्री एकनाथ शिदे यांचाही भाषण करतानाचा फोटो लावण्यात आला आहे. एकनाथ शिंदेंच्या भाषणाकडे लक्ष ‘ऑपरेशन टायगर’ फत्ते केल्यानंतर आता उपमुख्यमंत्री एकनाथ शिंदे व्यासपीठावरून काय गर्जना करणार, याकडे सर्वांचे डोळे लागले आहेत. राज्यातील विविध निवडणुकांतील पक्षाची घोडदौड आणि त्यानंतर थेट ६ खासदारांचे विलीनीकरण यावर उपमुख्यमंत्री भाष्य करण्याची शक्यता आहे. तसेच, आगामी राजकारणाचे रणशिंग फुंकत ते विरोधकांचा समाचार कसा घेतात, हे पाहणे उत्सुकतेचे ठरणार आहे.
