श्री संत जगन्नाथ महाराज प्राणप्रतिष्ठा व जन्मोत्सव सोहळ्याचे आयोजन
सुरेश पाचभाई | मारेगाव
मारेगाव तालुक्यातील कोलगाव नगरी आजपासून अक्षरशः भक्तिरसात न्हाऊन निघणार असून ‘आराध्य दैवत वंदनीय विदेही सद्गुरु श्री संत जगन्नाथ महाराज’ यांच्या मूर्ती प्राणप्रतिष्ठापनेचा तिसरा वर्धापन दिन आणि जन्मोत्सव सोहळ्याला भव्य आणि दणदणीत सुरुवात होत आहे. ग्रामस्थांच्या अथक परिश्रमातून आणि दानशूरांच्या सहकार्याने उभारलेल्या या पवित्र देवस्थान परिसरात दोन दिवसीय भक्तीमय महाउत्सवाचे आयोजन करण्यात आले आहे.
बुधवार, १५ एप्रिल रोजी सकाळी १०:१० वाजता मूर्ती वंदन सोहळ्याने कार्यक्रमांची मंगल सुरुवात होणार असून त्यानंतर महाप्रसाद (घुगरी काला) वाटप करण्यात येणार आहे. दुपारी १२ वाजल्यापासून भव्य भजन संमेलन रंगणार आहे.
सायंकाळी ७ वाजता प्रसिद्ध भारुड सम्राट ह.भ.प. निंबाजी महाराज तागड (वाशिम) व त्यांच्या संचाचा ‘रंगीत तथा संगीत भारुड’ कार्यक्रम रसिकांना मंत्रमुग्ध करणार आहे.
गुरुवार, १६ एप्रिल रोजी सकाळी १० वाजल्यापासून उर्वरित भजन संमेलनाचे आयोजन करण्यात आले आहे. दुपारी १२ वाजता प्रख्यात कीर्तनकार ह.भ.प. सौ. सुवर्णाताई प्रकाश पिंपळकर यांचे ‘काल्याचे कीर्तन’ होणार असून, भक्ती आणि अध्यात्माचा संगम अनुभवायला मिळणार आहे. दुपारी ४ वाजता महाप्रसाद व त्यानंतर महाभोजनदानाचा भव्य कार्यक्रम पार पडणार आहे.
सायंकाळी ७ वाजता ‘भजनसंध्या’ने या भक्तिमय सोहळ्याची सांगता होईल.या दोन दिवसीय सोहळ्यात सहभागी होण्यासाठी परिसरातील भाविकांनी मोठ्या संख्येने उपस्थित राहावे, असे आवाहन समस्त कोलगाव ग्रामवासीयांच्या वतीने करण्यात आले आहे. कोलगाव नगरीत उभा राहिलेला हा भक्तीचा महाकुंभ भाविकांसाठी एक अद्वितीय आध्यात्मिक पर्व ठरणार आहे.
