बातमी ऐका (Marathi Voice Reader)
हिंगोली शहरात पोलिस विभागाच्या वतीने हेल्मेट सक्ती नंतर आता हळूहळू दुचाकी वाहन चालक हेल्मेट परिधान करून वाहन चालवत असल्याचे चित्र आहे. वाहतूक शाखेने शनिवारी तारीख २५ या वाहन चालकांचा गुलाब पुष्प देऊन सत्कार केला. हिंगोली जिल्ह्यातील अपघाताचे प्रमाण कमी करून जीवितहानी व वित्तहानी टाळण्यासाठी महाराष्ट्र शासनाच्या निर्देशाप्रमाणे हिंगोली जिल्हा पोलिस अधीक्षक डॉ. नीलाभ रोहन यांनी हेल्मेट सक्ती व वाहतूक नियमांचे पालन करण्याचे बंधन घालून नियम मोडणाऱ्याविरुद्ध कठोर कार्यवाहीचे हत्यार उपसले आहे. याबाबत आवश्यक त्या सूचनाही वाहतूक शाखेला दिले आहेत. त्यानुसार ता २१ रोजी पहिल्याच दिवशी 511 वाहन चालकांवर कारवाई करून तब्बल पाच लाखापेक्षा अधिक दंड ठोठावला होता. त्यानंतर आता वाहन चालक हेल्मेट घालून दुचाकी चालवत असल्याचे आढळून आले आहे. त्यानुसार हेल्मेट घालून दुचाकी चालवणाऱ्या नागरिकांना शहर वाहतूक शाखेच्या वतीने गुलाबपुष्प देऊन त्यांचा सत्कार करण्यात आला आहे. यावेळी पोलीस निरीक्षक शरद मरे, जमादार गजानन राठोड, शिवाजी पारस्कर यांच्यासह पोलीस कर्मचारी उपस्थित होते. वाहन चालकांनी सुरक्षित प्रवास करण्यासाठी वाहतूक नियमांचे पालन करावे. दुचाकी वर जाताना हेल्मेटचा वापर करावा, दुचाकी वर ट्रिपल सीट जाऊ नये, फोर व्हीलर चालवताना सीट बेल्टचा वापर करावा तसेच इतर वाहतूक नियमांचे व पोलिसांच्या सूचनेचे पालन करावे असे आवाहन वाहतूक शाखेचे पोलिस निरीक्षक शरद मरे यांनी केले आहे.
