राज्यातील सर्वसामान्यांची जीवनवाहिनी असलेल्या एसटी महामंडळाला डिझेल दरवाढीचा मोठा फटका बसला आहे. डिझेलच्या किमतीत प्रति लिटर ३ रुपये १० पैशांची वाढ झाल्यामुळे महामंडळावर वार्षिक तब्बल १२४ कोटी रुपयांचा अतिरिक्त आर्थिक भार पडणार आहे. परिवहन मंत्री तथा एसटी महामंडळाचे अध्यक्ष प्रताप सरनाईक यांच्या अध्यक्षतेखाली झालेल्या वरिष्ठ अधिकाऱ्यांच्या बैठकीत यावर चर्चा झाली. सध्या प्रवासी भाडेवाढीचा प्रस्ताव विचाराधीन असला, तरी प्रवाशांवर तातडीने भाडेवाढ लादली जाणार नाही, अशी ग्वाही मंत्री सरनाईक यांनी दिली आहे. सोबतच, परिवहन विभागाने मनमानी कारभार करणाऱ्या ई-बाईक अॅग्रीगेटर कंपन्यांनाही कडक नियमावली लागू केली आहे. ‘ओला-उबेर, रॅपिडो’ला कडक इशारा अन् नवे नियम “शासनाच्या अटी-शर्ती मान्य करूनच व्यवसाय करा, प्रवाशांच्या सुरक्षेबाबत कोणतीही तडजोड सहन केली जाणार नाही,’ अशा शब्दांत सरनाईक यांनी कंपन्यांना सुनावले आहे. भाडेवाढीच्या प्रस्तावावर प्राधिकरणाच्या मंजुरीनंतर निर्णय सर्वसामान्य प्रवाशांवर कमीत कमी आर्थिक भार पडावा यासाठी शासन इंधन बचत, ई-बसचा वाढता वापर आणि महसूलवाढीच्या इतर पर्यायांवर भर देत आहे. भाडेवाढीचा प्रस्ताव राज्य परिवहन प्राधिकरणाकडे मान्यतेसाठी पाठवला जाईल, त्यांच्या मंजुरीनंतरच अंतिम निर्णय होईल. – प्रताप सरनाईक, परिवहन मंत्री असा पडणार ‘एसटी’वर आर्थिक बोजा
