बातमी ऐका (Marathi Voice Reader)
नागपूर-तुळजापूर महामार्गावरील गोधणी चौफुलीलगत असलेल्या हनुमान मंदिराजवळ शुक्रवारी रात्री एक भीषण अपघात घडला. एका भरधाव आणि अनियंत्रित १४ टायर ट्रकने आमदार राजू तोडसाम यांच्या पत्नी प्रिया तोडसाम यांच्या वाहनाला समोरून जोरदार धडक दिली. या भीषण धडकेनंतर ट्रक दुसऱ्या एका उभ्या वाहनावर जाऊन आदळला. या अपघातात प्रिया तोडसाम यांच्यासह वाहनातील इतर व्यक्ती जखमी झाल्या असून, त्यांना एका खाजगी रुग्णालयात उपचारासाठी दाखल करण्यात आले आहे. या प्रकरणी पोलिस सूत्रांकडून मिळालेल्या माहितीनुसार, नागपूर-तुळजापूर महामार्गावर गोधणी गावाजवळील हनुमान मंदिराजवळ एक सहाचाकी ट्रक क्रमांक (एमएच १०, एडब्ल्यू ४५३७) रस्त्याच्या कडेला उभा होता. यावेळी नागपूरच्या दिशेने येत असलेल्या एका १४ चाकी ट्रकने क्रमांक (एमएच ४०, बीजी १६३७) अचानक ताबा सुटल्याने समोरून येणाऱ्या प्रिया तोडसाम यांच्या वाहनाला क्रमांक (एमएच ४९ सीएल ६७५०) भीषण धडक दिली. धडक एवढी तीव्र होती की, स्कार्पिओचा दर्शनी भाग चक्काचूर झाला. यामध्ये आमदार राजू तोडसाम यांच्या पत्नी प्रिया तोडसाम या जखमी झाल्या. फिर्यादीवरून ट्रकचालकाविरुद्ध गुन्हा नोंदवला आहे.
