बातमी ऐका (Marathi Voice Reader)
छत्रपती संभाजीनगरातील हर्सूल-सावंगी बायपास परिसरातील एका शेतात ओंकार नावाच्या पाच वर्षीय गतिमंद बालकाचा मृतदेह आढळून आल्याने उडालेल्या खळबळीनंतर, गुन्हे शाखा आणि एमआयडीसी सिडको पोलिसांनी अवघ्या 24 तासांत या गुन्ह्याचा उलगडा करून सावत्र बाप संतोष सोनाजी ढाळे (वय 34, रा. मोप, जि. वाशिम) आणि जन्मदाती आई पूजा यांना अटक केली आहे. पोलिसांच्या कसून चौकशीत या अमानुष हत्येमागील धक्कादायक कारण उघडकीस आले असून, आपल्या नव्या संसारात हा गतिमंद मुलगा अडसर ठरत असल्याच्या रागातून जन्मदात्या आईनेच सावत्र बापाच्या साथीने त्याला निर्घृणपणे संपवल्याची कबुली पोलिसांसमोर दिली आहे. पूजाचे पहिले लग्न संदीप पाडेवाड याच्यासोबत झाले होते आणि त्यांना शुभांगी (10) व ओंकार (5) अशी दोन अपत्ये होती. मात्र, पाच वर्षांपूर्वी पती संदीप याचे दारूच्या व्यसनापायी निधन झाल्यानंतर, पूजाने आपली मुलगी सासूकडे सोपवली आणि ती आपला गतिमंद मुलगा ओंकार याला सोबत घेऊन मजुरीच्या निमित्ताने जालना येथे राहायला आली होती. सुमारे चार महिन्यांपूर्वी संतोष ढाळे याच्याशी ओळख झाल्यानंतर पूजाने त्याच्यासोबत शिर्डी येथे प्रेमविवाह केला. गेल्या महिन्याभरापासून हे दोघे चिकलठाण्यातील सावित्रीनगर येथे भाड्याच्या घरात राहत होते. मात्र, पूजाचा मुलगा ओंकार हा गतिमंद असल्याने या नव्या संसारात त्याची देखभाल करणे दोघांनाही जड जात होते; त्यातच संतोष दारूच्या नशेत ओंकारला वारंवार मारहाण करत असे. अखेर या मुलाचा कायमचा काटा काढण्यासाठी दोघांनी मिळून त्याच्या खुनाचा कट रचला आणि त्याची निर्घृण हत्या करून मृतदेह हर्सूल-सावंगी बायपास परिसरातील एका शेतात फेकून दिला. हर्सूल-सावंगी बायपास परिसरात या बालकाचा मृतदेह आढळताच, गुन्हे शाखा आणि एमआयडीसी सिडको पोलिसांनी तपासाची चक्रे वेगाने फिरवत, तांत्रिक तपासाच्या आधारे अवघ्या 24 तासांत दोन्ही आरोपींना गजाआड केले. आपल्या नव्या संसारासाठी अडसर ठरत असलेल्या एका निरागस आणि गतिमंद मुलाचा जन्मदात्या आईनेच सावत्र बापाच्या साथीने असा अमानुष बळी घेतल्याचे या तपासातून उघडकीस आल्याने समाजमन हेलावून गेले असून, सर्वत्र प्रचंड संतापाची लाट उसळली आहे.
