जिद्द, चिकाटी आणि कुटुंबाच्या भक्कम पाठबळाच्या जोरावर संशोधन क्षेत्रात उल्लेखनीय यश संपादन करत सवना येथील श्री शिवाजी शिक्षण संस्था द्वारा संचालित श्री विठ्ठल रुक्मिणी महाविद्यालय सवना, मधील वाणिज्य व व्यवस्थापन विभागाच्या प्राध्यापिका प्रा. किरण आशिष शुक्ला यांनी संत गाडगेबाबा अमरावती विद्यापीठ अंतर्गत वाणिज्य व व्यवस्थापन शाखेत नुकतीच आचार्य पदवी संपादन केली आहे. त्यांच्या या यशाबद्दल शैक्षणिक व सामाजिक क्षेत्रातून त्यांचे कौतुक होत आहे. ‘पश्चिम विदर्भातील शासकीय व निमशासकीय विभागांमध्ये कार्यरत विवाहित महिलांच्या कार्यजीवन संतुलनावर परिणाम करणाऱ्या सामाजिक-आर्थिक घटकांचा तुलनात्मक अभ्यास’ हा त्यांचा संशोधन विषय असून त्यांनी हा प्रबंध प्रा. डॉ. भास्कर पाढेन यांच्या मार्गदर्शनाखाली पूर्ण केला आहे. विवाहित महिलांच्या कार्यजीवनातील ताणतणाव, सामाजिक जबाबदाऱ्या आणि आर्थिक परिस्थिती यांचा सखोल अभ्यास या संशोधनातून करण्यात आला आहे. प्रा. शुक्ला यांनी राष्ट्रीय व आंतरराष्ट्रीय परिषदांमध्ये संशोधन निबंध सादर करून त्यांनी आपल्या अभ्यासू वृत्तीची छाप पाडली आहे. समाजोपयोगी विषयांवर भविष्यातही संशोधन व कार्य करण्याची इच्छा त्यांनी व्यक्त केली. विशेष म्हणजे फुलसिंग नाईक महाविद्यालय पुसद येथील वाणिज्य विभागातून आचार्य पदवी प्राप्त करणाऱ्या त्या प्रथम विद्यार्थिनी ठरल्या आहेत. हे संशोधन कार्य पूर्ण करण्यासाठी प्राचार्य डॉ. पी. वावरे, उपप्राचार्य व संशोधन केंद्रप्रमुख डॉ. संजय भोयर, वाणिज्य व व्यवस्थापन विभागप्रमुख डॉ. भूषण मनगटे, प्रा. पी. देशमुख, श्री शिवाजी शिक्षण संस्थाचे माजी अध्यक्ष विजय पाटील चोंढीकर, श्री शिवाजी शिक्षण संस्थाचे अध्यक्ष अनिरुद्ध पाटील, अश्विनी पाटील, सुभाष देशमुख, शिवाजीराव देशमुख यांचेही वेळोवेळी सहकार्य लाभले. महाविद्यालयाचे प्राचार्य प्रदीप जयस्वाल, माजी प्राचार्य डॉ. हेमंत महल्ले, सर्व प्राध्यापक व शिक्षकेतर कर्मचारी यांनीही त्यांना प्रोत्साहन दिले.
