बातमी ऐका (Marathi Voice Reader)
अवैधरित्या गोवंशाची कत्तल करुन त्याचे मांस विक्री करणाऱ्या एका कत्तलखान्यासह मांस विक्री करणाऱ्या शहरातील इस्लामपुरा परिसरातील ७ दुकानांवर पोलिसांनी बुधवारी २० मे रोजी एकाच वेळी संयुक्त कारवाई केली. या कारवाईत गोवंशाचे मास जप्त करण्यात आले असून १६ गोवंशाची सुटका करण्यात आली आहे. शहरातील इस्लामपुरा परिसरात जनावरांचा कत्तल खाना सुरू असल्याची माहिती पोलिसांना मिळाली होती. या माहितीच्या आधारावर उपविभागीय पोलिस अधिकारी दिनेश बैसाने, स्थानिक गुन्हे शाखा प्रमुख सतीश चावरे यांच्या नेतृत्वात पोलिस पथकाने कत्तल खाण्यावर थेट धड टाकली असता या ठिकाणी काही संशयास्पद वस्तू आढळून आल्या. सोबतच १६ गोवंश या कत्तलखान्यात आढळुन आले. ७ मांस विक्रीच्या दुकानात तपासणी करण्यात आली असता या दुकानात गोवंशाचे मांस आढळून आले. गुन्हे शाखेने चार, तर शहर डीबी पथकाने तीन दुकानावर कारवाई केली. रात्री उशीरा शहर पोलिस ठाण्यात गुन्हे दाखल करण्यात आले आहे. यात अकबर गुलाब कुरेशी, मुमताज अहमद मुनाफ कुरेशी, शफिक कुरेशी मेहमुद कुरेशी, अब्दूल नौशाद अब्दूल हाफिज कुरेशी, असे एका गुन्ह्यातील, तर अब्दुल आरीफ शेख कादर कुरेशी, अब्दुल आसिफ अब्दुल कादर कुरेशी, अब्दुल सादिक अब्दुल कादर कुरेशी, असे दुसर्या घटनेतील आरोपींचा समावेश आहे. गोवंशाचे चामडे, चरबी आढळली या ठिकाणी करण्यात आलेल्या कारवाई दरम्यान पोलिस पथकाने १६ गोवंश सुटका केली. यासोबतच कत्तलखान्यात कापलेल्या गोवंशाचे वाळलेले चामडे, चरबीने भरलेले डबे, गोवंशाला बांधायचे दावे आणि इतर आक्षेपार्ह वस्तू आढळून आल्या. या घटनेची माहिती दिल्यानंतर पालिकेच्या आरोग्य विभागाचे पथकही तेथे दाखल झाले होते. मांस विक्रीच्या दुकानांमध्ये कारवाई झाल्याची माहिती मिळताच कत्तलखाना बंद करुन तेथील आरोपींनी पळ काढला होता. त्यांचा शोध घेण्यात येत आहे.
