बातमी ऐका (Marathi Voice Reader)
मुंबई येथे मुख्यमंत्री एकनाथ शिंदे यांच्या उपस्थितीत शिवसेनेत जाहीर प्रवेश केल्यानंतर, खासदार संजय देशमुख यांचे प्रथमच दिग्रस शहरात आगमन झाले. याप्रसंगी त्यांच्या स्वागतासाठी जनसागर उसळला होता. मतदारसंघाच्या प्रगतीला आणि लोकविकासाला अधिक गती देण्याच्या उद्देशाने घेतलेल्या या निर्णयाचे दिग्रसकरांनी अत्यंत उत्साहात आणि भव्य रॅली काढून स्वागत केले. मुंबईहून परतल्यानंतर खासदार संजय देशमुख यांचा वाहनताफा रविवारी रात्री सुमारे १०.३० वाजता आर्णी नाका परिसरात दाखल होताच कार्यकर्त्यांनी फटाक्यांची आतषबाजी, घोषणाबाजी आणि डीजेच्या तालावर नृत्य करत उत्स्फूर्त स्वागत केले. समर्थकांनी पुष्पहारांचा वर्षाव करत खासदार देशमुख यांना शुभेच्छा दिल्या. यानंतर खासदार संजय देशमुख हे खुल्या वाहनात उभे राहून कार्यकर्त्यांच्या अभिवादनाचा स्वीकार करत आर्णी नाका ते छत्रपती शिवाजी महाराज चौक दरम्यान भव्य वाहन रॅलीत सहभागी झाले. मुसळधार पावसाची पर्वा न करता हजारो कार्यकर्ते या रॅलीत सहभागी झाले होते. ठिकठिकाणी फटाक्यांची आतषबाजी करण्यात आली. कार्यकर्त्यांनी वाहन थांबवून खासदार देशमुख यांच्या गळ्यात पुष्पहार घालत त्यांचे जंगी स्वागत केले. भर पावसातही कार्यकर्त्यांचा उत्साह ओसंडून वाहत असल्याचे चित्र पाहायला मिळाले. छत्रपती शिवाजी महाराज चौकात स्वागत स्वीकारल्यानंतर खासदार देशमुख चिंचोली येथील निवासस्थानी रवाना झाले. तेथे त्यांच्या पत्नी वैशाली देशमुख यांनी औक्षण करून त्यांचे स्वागत केले. निवासस्थानी उशिरापर्यंत कार्यकर्त्यांची मोठी गर्दी होती. दरम्यान, खासदार संजय देशमुख यांच्या दिग्रस आगमनाच्या पार्श्वभूमीवर कोणताही अनुचित प्रकार घडू नये, यासाठी पोलिस प्रशासन सतर्क झाले होते. खबरदारीचा उपाय म्हणून उबाठा शिवसेना गटाचे पूनम पटेल, दिग्रस शहरप्रमुख राहुल देशपांडे, शेखर चांदेकर यांना पोलिसांनी स्थानबद्ध केले होते. जनतेच्या विकासासाठी घेतलेला निर्णय जनतेच्या विकासासाठी, कार्यकर्त्यांच्या सन्मानासाठी आणि माझ्या मतदारसंघाच्या प्रगतीसाठी मी शिवसेनेत अधिकृतपणे प्रवेश केला आहे. जनतेचा आवाज अधिक प्रभावीपणे शासनापर्यंत पोहोचवण्यासाठी हा निर्णय घेतला आहे. मुख्यमंत्री तथा शिवसेना पक्षप्रमुख एकनाथजी शिंदे यांच्या नेतृत्वावर विश्वास व्यक्त करत भगव्या ध्वजाखाली नवी जबाबदारी स्वीकारली आहे. कार्यकर्त्यांचा विश्वास आणि साथ हेच माझे बळ असून, जनसेवेसाठी मी पूर्वीपेक्षा अधिक जोमाने कार्यरत राहीन. – संजय देशमुख, खासदार
