बातमी ऐका (Marathi Voice Reader)
मूर्तिजापूर-अकोला मार्गावरील दर्याव नगरसमोर शेतात वास्तव्यास असलेल्या एका प्रतिष्ठित व्यावसायिकाच्या बंगल्यात अज्ञात चोरट्यांनी धाडसी घरफोडी केली. बेडरूमच्या खिडकीची लोखंडी जाळी आणि कपाटाचे लॉकर कापून चोरट्यांनी तब्बल ८ लाख ३२ हजार ५०० रुपयांचे सोन्या-चांदीचे दागिने व मौल्यवान भांडी लंपास केली. ही घटना शनिवारी (दि. २४) रात्री घडली. पोलिसांच्या माहितीनुसार, “प्रकाश कृषी सेवा केंद्रा’चे संचालक प्रकाश सोमाणी हे कुटुंबासह या शेतातील बंगल्यात राहतात. त्यांचा मुलगा आणि सून रायपूर येथे डॉक्टर असल्याने, सोमाणी दांपत्य त्यांना भेटण्यासाठी गेले होते. नवीन ठिकाणी जात असल्याने सुरक्षिततेच्या कारणास्तव त्यांनी घरातील स्त्रीधन आणि मौल्यवान दागिने बँकेच्या लॉकरमध्ये ठेवण्याचे ठरवले होते. मात्र, कामाच्या व्यस्ततेमुळे दोन-तीन दिवस उशीर झाला आणि याच काळात चोरट्यांनी डाव साधला. चोरट्यांनी पाठीमागील कंपाउंड भिंतीवरून उडी मारून बंगल्यात प्रवेश केला. घटनेची माहिती मिळताच मूर्तिजापूर शहर पोलिसांनी घटनास्थळी धाव घेतली. अकोला येथून पाचारण करण्यात आलेले श्वानपथक आणि ठसे तज्ज्ञांनी (फिंगरप्रिंट एक्सपर्ट) तपास केला. श्वान रस्त्यापर्यंत आणि मागील देवळाच्या गेटपर्यंत जाऊन घुटमळले. न्याय संहितेच्या नवीन कलमांन्वये गुन्हा दाखल ब्रिटिशकालीन आयपीसी कायदे बदलल्यानंतर, या घटनेत मूर्तिजापूर पोलिसांनी नवीन कायद्यानुसार गुन्हा नोंदवला आहे. चोरट्यांविरुद्ध भारतीय न्याय संहिता २०२३ चे कलम ३०५ (चोरी), ३३१(३) आणि ३३१(४) (रात्रीची घरफोडी) अंतर्गत गुन्हा दाखल करण्यात आला आहे. नवीन कायद्यानुसार या गुन्ह्यांमध्ये कठोर शिक्षेची तरतूद आहे.
