बातमी ऐका (Marathi Voice Reader)
संत गाडगे बाबा अमरावती विद्यापीठातर्फे श्री संत गुलाबराव महाराजांच्या साहित्यावर संशोधन करणाऱ्या एका संशोधकाला फेलोशिप प्रदान करण्यात येणार आहे. दानदाते श्री वासुदेवराव देशमुख यांच्याकडून प्राप्त झालेल्या निधीतून ही योजना राबवली जात आहे. या फेलोशिप अंतर्गत, संत गुलाबराव महाराजांचे जीवन, साहित्य, विचार, तत्वज्ञान, शिक्षण आणि कवितेवर आचार्य पदवीसाठी (पीएच.डी.) संशोधन करणाऱ्या एका संशोधकाला प्रति वर्ष ६ हजार रुपये याप्रमाणे दोन वर्षांसाठी एकूण १२ हजार रुपयांचे आर्थिक सहाय्य मिळेल. शैक्षणिक वर्ष २०२६-२७ आणि २०२७-२८ साठी ही फेलोशिप दिली जाईल. यासाठी इच्छुक संशोधकांनी विद्यापीठात संशोधन करत असल्यास, विहित नमुन्यातील आवेदनपत्रे आगामी ३० जूनपर्यंत सादर करावीत, असे आवाहन करण्यात आले आहे. आवेदनपत्राचा नमुना आणि इतर तपशील विद्यापीठाच्या वित्त विभागात विनामूल्य उपलब्ध आहे. संशोधकांनी या संधीचा लाभ घ्यावा, असे आवाहन वित्त व लेखा अधिकारी सीए. पुष्कर देशपांडे यांनी केले आहे. अधिक माहितीसाठी त्यांच्याशी थेट संपर्क साधता येईल, असे विद्यापीठाने कळवले आहे.
