बातमी ऐका (Marathi Voice Reader)
अवघ्या २० तासांत तीन अपहरण प्रकरणांचा यशस्वी छडा लावत पीडित मुलींना सुरक्षित ताब्यात घेणे तसेच वाशीम जिल्ह्यातून आणखी एका अल्पवयीन पीडित मुलगी व आरोपीला ताब्यात घेण्याच्या उल्लेखनीय कामगिरीबद्दल दिग्रस पोलिस स्टेशनमधील अधिकारी व कर्मचाऱ्यांचा शनिवारी विशेष सत्कार करण्यात आला. याच कार्यक्रमात महागाव पोलिस स्टेशन येथे बदली झालेल्या पोलीस उपनिरीक्षक किशोर मुरकुटे यांना निरोप देण्यात आला. पोलिस निरीक्षक वैजनाथ मुंडे यांच्या हस्ते पोलिस उपनिरीक्षक महेश देशमुख, किशोर मुरकुटे, पोलीस अंमलदार देवा फलटणकर आणि पोलिस कॉन्स्टेबल अभय इंगोले यांचा शाल, श्रीफळ व पुष्पगुच्छ देऊन गौरव करण्यात आला. अल्पावधीत अनेक अपहरण प्रकरणांचा छडा लावत पीडित मुलींना सुरक्षित परत आणण्यात या पथकाने बजावलेल्या भूमिकेची उपस्थितांनी प्रशंसा केली. दिग्रस येथून महागाव पोलीस स्टेशन येथे बदली झालेल्या पोलिस उपनिरीक्षक किशोर मुरकुटे यांना सहकाऱ्यांनी निरोप दिला. त्यांच्या सेवाकाळातील कार्याचा गौरव करत पोलिस निरीक्षक वैजनाथ मुंडे यांनी त्यांना पुढील वाटचालीसाठी शुभेच्छा दिल्या. कार्यक्रमाचे सूत्रसंचालन सहाय्यक पोलिस निरीक्षक पंकज दाभाडे यांनी केले. यावेळी उपस्थित पोलिस अधिकारी व कर्मचाऱ्यांनी आपापले मनोगत व्यक्त करत किशोर मुरकुटे यांच्या कार्याचा गौरव केला तसेच एकत्रितपणे केलेल्या तपास, शोधमोहीमा आणि संघभावनेच्या आठवणींना उजाळा दिला. उपनिरीक्षक किशोर मुरकुटे यांनीही मनोगतात दिग्रस येथे मिळालेल्या सहकार्याबद्दल कृतज्ञता व्यक्त करत सर्व सहकारी अधिकारी व कर्मचाऱ्यांचे आभार मानले आणि पुढील सेवेतही याच निष्ठेने काम करण्याचा विश्वास व्यक्त केला. १३ जून रोजी दिग्रस पोलिस स्टेशन येथे झालेल्या या कार्यक्रमाला पोलिस अधिकारी व कर्मचारी मोठ्या संख्येने उपस्थित होते. कर्तव्यदक्ष पोलिसांचा सन्मान आणि बदली होणाऱ्या अधिकाऱ्याला दिलेला स्नेहपूर्ण निरोप यामुळे दिग्रस पोलिस दलातील सहकार्य, समर्पण आणि संघभावना अधोरेखित झाल्याचे यावेळी दिसून आले.
