बातमी ऐका (Marathi Voice Reader)
‘ज्येष्ठ नागरिक हे कुटुंब आणि समाजाचे अनुभवसंपन्न मार्गदर्शक असतात. त्यांच्या सन्मानाचे रक्षण करणे ही प्रत्येकाची नैतिक जबाबदारी आहे. वृद्धांवर अन्याय अथवा छळ होत असल्यास कायद्यात त्यांच्यासाठी सक्षम संरक्षणाची तरतूद असून न्यायव्यवस्था त्यांच्या पाठीशी ठामपणे उभी आहे,’ असे प्रतिपादन जिल्हा विधी सेवा प्राधिकरणाचे सचिव, न्यायाधीश दीपक दाभाडे यांनी केले. ज्येष्ठ नागरिक मंडळाच्या वतीने ज्येष्ठ नागरिक छळ प्रतिबंधक दिनानिमित्त आयोजित कार्यक्रमात ते अध्यक्षस्थानावरून बोलत होते. यावेळी पोलीस निरीक्षक एस. डी. वानखडे, अधिवक्ता सोनाली भोयर, मंडळाचे अध्यक्ष राजन टोंगो, संस्थापक अध्यक्ष बळवंतराव चिंतावार, उपाध्यक्ष विनोद सहस्रबुद्धे, सचिव पांडुरंग ढुमणे आणि प्रकल्प प्रमुख प्रल्हाद हिंगमिरे यांची प्रमुख उपस्थिती होती. कार्यक्रमाची सुरुवात दीपप्रज्वलन व सरस्वती पूजनाने झाली. मान्यवरांचे स्वागत केल्यानंतर अध्यक्ष राजन टोंगो यांनी प्रास्ताविकातून ज्येष्ठ नागरिकांच्या विविध प्रश्नांकडे लक्ष वेधले. प्रत्येक पोलिस ठाण्यात ज्येष्ठांसाठी स्वतंत्र सल्लागार कक्ष स्थापन करून त्यामध्ये ज्येष्ठ नागरिकांचा सहभाग वाढवण्याची मागणी त्यांनी या वेळी केली. अधिवक्ता सोनाली भोयर यांनी ज्येष्ठ नागरिकांच्या संरक्षणासाठी असलेल्या कायदेशीर तरतुदींची माहिती देताना कौटुंबिक छळ प्रतिबंधक कायदा आणि ज्येष्ठ नागरिकांच्या हक्कांबाबत सविस्तर मार्गदर्शन केले. तर पोलीस निरीक्षक एस. डी. वानखडे यांनी ज्येष्ठांच्या तक्रार निवारण प्रक्रियेची माहिती देत, आपत्कालीन परिस्थितीत ११२ क्रमांकावर संपर्क साधल्यास तातडीने पोलीस मदत उपलब्ध होईल, असे सांगितले. यावेळी लोकतंत्र सेनानी लक्ष्मण खत्री यांनी ज्येष्ठांच्या समस्या मांडल्या, तर साधना बंडेवार यांनी विविध मुद्द्यांवर प्रश्न उपस्थित केले. कार्यक्रमात ज्येष्ठांच्या हक्कांबाबत जागृती निर्माण करण्यासोबतच त्यांच्या सन्मानपूर्वक जीवनासाठी समाजाने संवेदनशील भूमिका घेण्याचे आवाहन करण्यात आले. कार्यक्रमाचे मार्गदर्शन बळवंतराव चिंतावार यांनी केले. संचालन विजय विसपुते यांनी तर आभार प्रदर्शन पांडुरंग ढुमणे यांनी केले. कार्यक्रमाच्या यशस्वीतेसाठी वासुदेव कांबळे, चित्रा देशपांडे, कृष्णा तपके यांच्यासह मंडळाच्या पदाधिकाऱ्यांनी परिश्रम घेतले. अन्यायाविरुद्ध आवाज उठवण्याचे आवाहन ज्येष्ठ नागरिकांनी अन्याय, दुर्लक्ष किंवा छळ सहन न करता कायदेशीर मदतीचा आधार घ्यावा, असे आवाहन कार्यक्रमात करण्यात आले. विधी सेवा प्राधिकरण, पोलिस प्रशासन आणि सामाजिक संस्था ज्येष्ठांच्या मदतीसाठी सदैव तत्पर असल्याचा विश्वासही या वेळी व्यक्त करण्यात आला.
