बातमी ऐका (Marathi Voice Reader)
पुणे स्थानिक स्वराज्य संस्था मतदारसंघाच्या विधान परिषद निवडणुकीसाठी राष्ट्रवादी काँग्रेसने विक्रम काकडे यांची उमेदवारी जाहीर केली आहे. भाजपचे ज्येष्ठ नेते आणि माजी खासदार संजय काकडे यांचे पुत्र असलेल्या विक्रम काकडे यांच्या उमेदवारीमुळे पुण्याच्या राजकीय वर्तुळात नवा वाद निर्माण होण्याची शक्यता आहे. या उमेदवारीसाठी खासदार पार्थ पवार यांनी विशेष प्रयत्न केले, ज्यामुळे पक्षातील अनेक निष्ठावंत इच्छुक नाराज झाले आहेत. रविवारी रात्री राष्ट्रवादी काँग्रेसच्या पुणे कार्यालयात उमेदवारी निश्चितीसाठी एक मॅरेथॉन बैठक झाली. रात्री साडेआठ वाजता सुरू झालेली ही बैठक पहाटे दीड वाजेपर्यंत, म्हणजेच तब्बल पाच तास चालली. या बैठकीत उमेदवारीवरून मोठी रस्सीखेच पाहायला मिळाली. पक्षातील अनेक ज्येष्ठ नेते निष्ठावंत कार्यकर्त्याला संधी देण्यावर ठाम होते. महायुतीच्या जागावाटपात मुख्यमंत्री देवेंद्र फडणवीस यांच्या मध्यस्थीनंतर ही जागा राष्ट्रवादी काँग्रेसच्या वाट्याला आली होती. मात्र, उमेदवार कोण असावा, यावर रात्री उशिरापर्यंत चर्चा सुरू होती. अखेर, खासदार पार्थ पवार यांच्या आग्रहामुळे आणि मुख्यमंत्री देवेंद्र फडणवीस यांच्या सहमतीनंतर विक्रम काकडे यांच्या नावावर शिक्कामोर्तब करण्यात आले. विक्रम काकडे हे पार्थ पवार यांचे निकटवर्तीय मित्र मानले जातात. गेल्या काही वर्षांपासून ते पुण्यात सामाजिक उपक्रमांमध्ये सक्रिय आहेत. मात्र, पक्षाच्या संघटनात्मक कामात किंवा कठीण काळात त्यांचे योगदान किती होते, याबाबत पक्षातच काही प्रश्न उपस्थित केले जात आहेत. या जागेसाठी अजित पवार गटातील अनेक इच्छुक नेते प्रयत्नशील होते. माजी आमदार सुनील टिंगरे यांच्या नावाचीही जोरदार चर्चा होती. टिंगरे हे महायुतीचे सक्षम उमेदवार ठरू शकतील, असा अंदाज होता. मात्र, ऐनवेळी सुनेत्रा पवार यांनी विक्रम काकडे यांच्या उमेदवारीला पाठिंबा दिल्याने निष्ठावंत इच्छुकांच्या आशांवर पाणी फिरले. विक्रम काकडे हे मूळचे भाजपचे माजी खासदार संजय काकडे यांचे पुत्र आहेत. त्यामुळे मूळ राष्ट्रवादीच्या नेत्यांना डावलून भाजपशी संबंधित व्यक्तीला उमेदवारी दिल्याने कार्यकर्त्यांमध्ये नाराजी पसरली आहे. ‘पक्षात अनेक वर्षांपासून एकनिष्ठेने काम करणाऱ्या नेत्यांना उमेदवारी मिळत नसेल आणि नेत्यांचे मित्र थेट तिकिटे पटकावत असतील, तर कार्यकर्त्यांनी कोणासाठी काम करायचे?’ असा सवाल आता उपस्थित केला जात आहे. पार्थ पवार यांच्या या भूमिकेमुळे पक्षातील अंतर्गत संघर्ष आणखी वाढण्याची शक्यता वर्तवली जात आहे.
