बातमी ऐका (Marathi Voice Reader)
नागपूर शहर पोलिसांच्या अंमली पदार्थ विरोधी (एनडीपीएस) पथकाने गिट्टीखदान पोलिस ठाणे हद्दीतील विश्वास नगर परिसरात मोठी कारवाई केली आहे. या कारवाईत एमडी (मेफेड्रोन) पावडर, घातक शस्त्रे तसेच चोरीचा संशय असलेले सोन्या-चांदीचे दागिने असा एकूण सुमारे 16 लाख 13 हजार रुपयांचा मुद्देमाल जप्त करण्यात आला. या प्रकरणी तीन आरोपींना अटक करण्यात आली असून, एका फरार आरोपीचा शोध सुरू आहे. पोलिसांनी दिलेल्या माहितीनुसार, 17 जून रोजी पहाटे 2.50 ते सकाळी 7.40 वाजेदरम्यान दाऊद पान सेंटरजवळील सार्वजनिक रस्त्यावर गस्तीदरम्यान काही संशयास्पद व्यक्तींना ताब्यात घेण्यात आले. त्यांच्याकडे 16 ग्रॅम एमडी (मेफेड्रोन) पावडर आढळून आली. या आरोपींच्या घरांची झडती घेतली असता, सत्तूर, तलवार यांसारखी शस्त्रे तसेच चोरीचा संशय असलेले 88.200 ग्रॅम सोन्याचे आणि 876.800 ग्रॅम चांदीचे दागिने जप्त करण्यात आले. या प्रकरणी आकाश राजू हतागडे (37, विश्वास नगर), योगेश संजू सीरिया (30, गवळीपुरा, सदर) आणि आकाश गजानन टाले (30, मानव सेवा नगर) यांना अटक करण्यात आली आहे. तपासादरम्यान, आकाश हतागडे याने एमडी पावडर योगेश सीरियाकडून खरेदी करून ती आकाश टालेला देणार असल्याची माहिती समोर आली. योगेश सीरिया याने ही एमडी पावडर आकाश कटारिया उर्फ अक्कूकडून घेतल्याचे निष्पन्न झाल्याने, पोलीस त्याचा शोध घेत आहेत. आरोपींविरुद्ध एनडीपीएस कायदा कलम 8 (क), 22 (ब), 29, भारतीय हत्यार कायदा कलम 4 व 25 तसेच महाराष्ट्र पोलीस कायद्याच्या संबंधित कलमांखाली गुन्हा दाखल करण्यात आला आहे.
