बातमी ऐका (Marathi Voice Reader)
लेखिका, पत्रकार डॉ. शुभांगी अरुण जोशी लिखित ‘सोलीना’ या पुस्तकाचा प्रकाशन सोहळा झाला. या वेळी उद्योजक नितीन देशमुख, कल्पना देशमुख यांच्या हस्ते पुस्तकाचे प्रकाशन केले . या वेळी विमल जोशी यांच्या सहस्त्र चंद्रदर्शन सोहळ्याचे औचित्यही साधले. ‘सोलीना’ हे पुस्तक डॉ. शुभांगी जोशी यांच्या स्व. मातोश्री विभावरी हिवरखेडकर यांच्या जीवनावर आधारित असून, एका सामान्य स्त्रीच्या असामान्य जीवनसंघर्षाची कहाणी यातून उलगडली. संघर्ष, त्याग, जिद्द, कुटुंबासाठीचे समर्पण, जीवनमूल्यांची जपणूक यांचा संगम या पुस्तकात अनुभवायला मिळतो. आईच्या स्मृतींना शब्दबद्ध करताना लेखिकेने भावनिकता, वास्तव यांचा समतोल साधल्याचे मत नितीन देशमुख यांनी व्यक्त केले. डॉ. शुभांगी जोशी या शिक्षण, साहित्य समाजप्रबोधन क्षेत्रात कार्यरत बहुआयामी व्यक्तिमत्त्व आहेत. त्या इंग्रजीच्या प्राध्यापिका म्हणून कार्यरत आहेत. स्त्रीजीवन, सामाजिक परिवर्तन, साहित्य अभ्यास यावरील त्यांचे संशोधनउल्लेखनीय मानले जाते. सुधा मूर्ती यांच्या कादंबऱ्यांतील स्त्री पात्रांच्या परिवर्तनाचा अभ्यास यावर त्यांनी पीएच.डी. प्राप्त केली. प्रकाशन सोहळ्यात मान्यवरांनी ‘सोलीना’ या पुस्तकाचे कौतुक करत स्व. विभावरी हिवरखेडकर यांच्या जीवनाला शब्दरूप देण्याच्या लेखिकेच्या प्रयत्नांचे अभिनंदन केले. आईच्या जीवनसंघर्षातून प्रेरणा घेऊन पुढील पिढीपर्यंत संस्कार, मूल्ये, जिद्दीचा वारसा पोहोचविणारे हे पुस्तक आहे, असे मत अनेकांनी व्यक्त केले.यावेळी अरुण जोशी, डॉ. शुभांगी जोशी, विमल जोशी, संदीप हिवरखेडकर यांची उपस्थिती होती.
