अशोक खरातच्या अडचणीत वाढ:ऑफिसबॉयच्या सीडीआरमधून 40 महिलांचे नंबर आले समोर; पोलिसांसमोरच दोघांमध्ये शाब्दिक वाद

नाशिकमधील बहुचर्चित अशोक खरात प्रकरणाच्या तपासाला आता वेग आला असून, विशेष तपास पथकाने शनिवारी अशोक खरात आणि त्याचा ऑफिसबॉय नीरज जाधव यांची समोरासमोर बसवून चौकशी केली असता, पोलिसांदेखतच दोघांमध्ये जोरदार शाब्दिक चकमक उडाली. या नाट्यमय घडामोडीसोबतच नीरज जाधवच्या कॉल डिटेल्स रेकॉर्डमध्ये (सीडीआर) तब्बल 30 ते 40 महिलांचे संपर्क क्रमांक आढळल्याने प्रकरणाचे गांभीर्य अधिकच वाढले आहे. या नव्या धाग्यादोऱ्यांमुळे एसआयटीच्या हाती लवकरच ठोस पुरावे लागण्याची शक्यता वर्तवली जात आहे. तसेच अशोक खरात प्रकरणाच्या तपासात विशेष तपास पथकाने मोठी कारवाई करत खरातच्या ‘ईशान्येश्वर’ मंदिराशी संबंधित पुजारी आणि अन्य दोन कर्मचाऱ्यांना चौकशीसाठी ताब्यात घेतले आहे. या महत्वपूर्ण पावलामुळे मंदिराच्या नावाखाली चालणाऱ्या संशयास्पद हालचाली आणि या संपूर्ण प्रकरणातील दडलेले अनेक धक्कादायक धागेदोरे लवकरच उलगडण्याची दाट शक्यता वर्तवली जात आहे. विशेष तपास पथकाने नीरज जाधवच्या कॉल डिटेल रेकॉर्डची सखोल तपासणी केली असता, त्यामध्ये तब्बल 30 ते 40 महिलांचे संपर्क क्रमांक आढळल्याने या प्रकरणाला आता मोठे वळण मिळाले आहे. ‘फोकस प्रॉपर्टी’ येथे ऑफिसबॉय म्हणून काम करत असताना नीरज या महिलांच्या सतत संपर्कात राहून त्यांना अशोक खरातचे निरोप पोहोचवत असल्याची माहिती समोर आली आहे. या नव्या खुलाशामुळे नीरज जाधवच्या माध्यमातून महत्त्वाचे पुरावे हाती लागण्याची दाट शक्यता असून, या भोंदूबाबाची सर्व काळी कृत्ये आणि गुन्हेगारी कुंडली लवकरच उघड होणार असल्याची शक्यता आहे. अशोक खरात प्रकरणातील तपासाचा वेग कायम असून, आज रविवारी सुट्टीचा दिवस असतानाही एसआयटीचे अधिकारी हिमांशू चौकशीसाठी पोलिस क्लब येथे दाखल झाले आहेत. खरातची आज पुन्हा एकदा एसआयटीमार्फत कसून चौकशी केली जाणार असून, या चौकशीतून नवीन आणि महत्त्वाचे धागेदोरे हाती लागण्याची शक्यता आहे. आयकर विभागाची प्रकरणात उडी या प्रकरणाला आता आर्थिक वळण मिळाले असून, एसआयटीच्या जोडीला आयकर विभागाने देखील या तपासात उडी घेतली आहे. खरातच्या नावावर असलेल्या कोट्यवधींच्या मालमत्ता, संशयास्पद व्यवहार, उत्पन्नाचे स्त्रोत आणि प्राप्तिकर विवरणपत्रांची आता सखोल पडताळणी होणार आहे. विशेष म्हणजे, त्याला आर्थिक मदत करणारे देणगीदार आणि त्याचे व्यावसायिक भागीदारही आता तपास यंत्रणांच्या रडारवर आले असून, खरातच्या मोठ्या आर्थिक जाळ्याचा लवकरच पर्दाफाश होण्याची चिन्हे आहेत.